Gäzitlärneñ tışlıq bitlärendä Tatarstan prezidentınıñ Alabuğağa säfäre teması töp urınnı alıp tora. Täñgälläşterü waqıtında, irekle iqtisadi zona turındağı qanun ğämäldän çıqqaç, «Alabuğa» sänäğät mäydançığınıñ xälen kiskenläşep kitü qurqınıçı tuğan ide. Alabuğa cirendä, yaña şartlarda eşläw turında, şul yaqlarda bulğan cielışta süz bardı da. Tatarstan yağı, eşne investitsiä qanunı häm respublika qaramağında bulğan salımnarnı kimetep qorırğa isäpli ikän. «Alabuğa» sänäğät mäydançığı häm üseş plannarı turında, Время и Деньги häm başqa gäzitlärdä uqıp bula.
Tatarstan yäşläre gäzite respublika Prezidentı belän külämle äñgämä bastırdı. «Büränä arqılı büre quyıp bulmıy» digän baş astında çıqtı ul. Mintimer Şäymiev anda Tatarstan yäşläre baş möxärrire İsmäğil Şäräfiev sorawlarına cawap birä. Äñgämä awıl häm anda yäşäwçe keşelär turında fiker alışudan başlana. Mintimer Şäymiev : «...awıl – yäşäyeş häm tereklek çığanağı, bezneñ ruxi çişmäbez...», - dip bilgeläp kitä. Söyläşüdä süz, tartıp alu häm büleşü mäs’äläse, Tatarstan belän Rusiä arasında wäqälätlär almaşu turındağı şartnamä xaqında da bara.
Mintimer Şäymiev : «...17 yılğı tartıp alulardan tarix sabağın alası ide..», dip äytä häm «...xäyerçedän bay Tatarstan tözep bulmıy», digän fiker belderä. «... Qulınnan eş kilä torğan bay keşelär kübräk bulıp, alarğa mömkinleklär tudırası ide», dip sanıy Mintimer Şäymiev.
Anıñ süzlärençä, xalıqnıñ tormışqa qaraşın üzgärtergä kiräk: «Kemnänder närsäder tartıp alıp häm anı üzara büleşü xisabına ğına yäşäp bulmıy». Tatarstan citäkçese belän söyläşü, säyäsät häm xakimiät firqäse turındağı sorawlar belän däwam itterelä. ««Berdäm Rusiä» firqäse saylawlarda ciñgäç, mäğlümat çarasında KPSS zamannarı belän çağıştırular kitte, - digän soraw birä gäzit möxärrire. Prezident bolay cawap birä:
« Min elek tä äytä kildem : xäzer dä äytäm. Nindi dä bulsa partiä xakimiätkä kilergä tieş ide. Real’ küppartiälelek bulmasa, bezneñ ildä demokratiä dä bulmıy, grajdanlıq cämğiäte dä. Xäzerge wazğiättä, älbättä, Tatarstanğa qaraş nindi bulır, respublikanıñ xoquqları, milli mäs’älälär niçek xäl iteler ikän, digän sorawlar da bar, yäğni yaña xakimiät nindi säyäsät uzdırır? ... Xakimiätkä kilgäç wäğdälären niçek ütärlär- bu xaqta da şik-şöbxälär yuq tügel...» - dip cawap birä Tatarstan Prezidentı. Ul şulay uq, Dumadağı deputatlarnı iskä ala häm «...miç başında yatıp, öydän büre quıp qına bulmıy..» dip äytä. Bu äñgämä Tatarstan yäşläre gäzitendä dönya kürde.
Küpçelek gäzitlärdä, şulay uq, Nurixan Fättaxnıñ ülüe xaqında qayğınämälär dönya kürde.
Bikä Timerova.
