Udmurtiä şähärlärendä soñğı yıllarda çit illärdän qunaqlar küpläp bulalar. Berençedän, bu iqtisad ölkäsenä bäyle säfärlär bulsa, şulay uq yuğarı uqu yortları da — bigräk tä çit tellär uqıtu fakul'tetları Yevropa şähärläre belän elemtälärne nığıta.
Köz aylarında — «Azatlıq» radiosın daimi tıñlawçılar xäterlider — İjawda Almaniä häm Angliädän wäkillär bulıp kitkän ide. Alar Udmurt däwlät universitetında bulıp, şul uq waqıtta şähärneñ tatar, udmurt balaları tuplanğan baqçalarında da nänilärgä tuğan telne uqıtu alımnarı häm milli tärbiä birü eşe belän tanıştı. Ütkän comğada universitet uqıtuçıları İjaw şähäreneñ 116nçı baqçasınıñ tatar törkemenä Fransiädän kilgän qunaqlar belän kildelär. Fransiä yegete Filipp üzen tatar balalarınnan isänläşergä, sawbullaşırğa öyrätüen soradı, üze dä alarnı fransuz telendä berniçä süz öyrätep, cırlap ta kürsätte, balalar çit il qunağına ana telendä şiğerlär uqıdılar
Audio
Annan soñ ölkänräk balalar häm tärbiäçelär bergäläp säxnäläşterelgän «Käcä belän Büre» äkiäten kürsättelär. Filipp tatar telen belmim, ämma teatr tele añlaşıla dide. Häm tuğan telne öyrätüne dä kiläçäk öçen bik kiräkle dip assızıqladı. Tärbiäçelär eşenä yaxşı bäyä birde.
Audio
Balalarğa tuğan tel, cırlar, iyüllär öyrätü belän genä çiklänmilär biredä. Respublikada yäşäwçe rus, tatar, udmurt xalıqlarınıñ tarixı belän dä tanıştıralar. Monıñ öçen berniçä yıl elek baqçada könküreş qullanu äyberlärennän muzey bülmäse dä oyıştırdılar. Ul könne här xalıqnıñ qullanu äyberläre turında söylädelär qunaqqa. Fransuz yegete muzeynıñ tatar öyen xäterlätkän öleşendä ozağraq tuqtalıp, anda quyılğan äyberlärne centekläp qaradı.
Baqçada ul könne kürşe — Tatarstan respublikasınıñ Ägerce rayonınıñ da mäktäpkäçä yäştäge balalarnı tärbiäläw bülegennän belgeçlär Liliä Yapparova häm Rozaliä Ğaneyeva da tuğan telne öyrätüneñ quyılışı, milli tärbiä birü eşeneñ alıp barıluı belän tanıştılar. Alar da 116nçı baqça tärbiäçeläreneñ eşen yuğarı bäyäläde.
Audio
Yuğarı uqu yortlarınıñ häm çit il qunaqlarınıñ milli törkemnär bulğan baqçalarğa çığuınıñ maqsatı — balalarğa berrättän berniçä tel öyrätü eşen başlaw. Baqça xezmätkärläre şulay itep milli törkemnärneñ statusın kütärergä niätli. Annan tağın tatar—ingliz—rus telläre öyrätelgän törkemnärgä ata — analar da, zaman taläplärenä iärep, sabıyların şuşı törkemnärgä kübräk kiterer digän ömet tä yuq tügel.
Xämidä Ğäyfullina, «Azatlıq» radiosı, Udmurtiä.
