Ütkän atnada İjaw şähäreneñ sänğät muzeyenda TAMĞA törkemenä berläşkän rässämnärneñ kürgäzmäse açıldı. Älege törkemgä Tatarstannıñ Qazan, Çallı, Alabuğa şähärlärennän häm Başqortstan respublikası başqalası Ufada yäşäp icat itüçe rässämnär kerä. Alarnı berläşterüçe Çallı şähärennän ostaz Xämzä Şäripov. Rässämnär tatar xalqınıñ borınğı tarixına tayanıp, bik üzençälekle, cihanğa omtılğan eşläre belän tanış. Tamğa — närsä soñ ul. Bu xaqta Ufadan Salawat Giläzetdinov
Audio
İjawda Tamğa törkemenä kergän rässämnärneñ kürgäzmäsen oyıştıru mömkinlege tuuın rässämnär üzläreneñ biredäge udmurt ostazları belän etnofuturizm festivalendä aralaşuları belän bäyle didelär. Şundıylarnıñ berse — Yuri Lobanov TAMĞA törkemenä kergän rässämnärneñ eşläre belän Udmurtiä xalqın da tanıştırırğa täqdim itkän, şulay itep etnofuturizm yunäleşendä icat itüçe rässämnär bu yaqlarğa kilep çıqtı. İcatlarındağı yünäleş häm anıñ fin-uğır xalıqları belän bäyläneşe turında Xämzä Şäripov.
Audio
Ä şulay da unlap rässämne närsä berläşterä soñ. Bu xaqta Ufadan Salawat Giläzetdinov bolay dide
Audio
Milli töslär qullanıp rässämnär tuğan cirlärenä mädxiä cırlıy. Milli kostyumnar, xalqıbıznıñ üzençälekle könküreş qullanu äyberläre aşa bezneñ borınğı tarixıbız belän tanışırğa da mömkin. Kürgäzmä açılğan könne rässämnär tantanağa cıyılğan xalıqnı üzläreneñ icatı belän bik centekläp tanıştırdı.
Şulay uq ul könne tatar—başqort rässämnäre icatınnan tış millättäşlärebez udmurt xalqınıñ yolaları belän dä tanışa aldı. Rässämnärne İjawğa çaqıruçı, kürgäzmäne oyıştıruçılarnıñ berse Udmurtiäneñ atqazanğan rässäme — Yuri Lobanov, üzeneñ icat törkeme belän udmurt xalqınıñ borınğı — öyne çit köçlärdän saqlaw yolasın kürsätte.
Xämidä Ğayfullina, «Azatlıq» radiosı, Udmurtiä.
