Sişämbe könne tatarça çığa torğan gäcitlärneñ sanı küp tügel. Ä menä alar arasında iñ qızıqlısı, eçtäleklese – Tatarstan yäşläreder, möğayın. Şunnan başlıyq ta bügenge küzätüne. Älege gäcit üzeneñ berençe bitendä ük mäğärif ölkäsendäge rişwätçelek problemasına möräcäğät itä. Şuşı xaqtağı yazmada Rusiä Yuğarı iqtisat mäktäbe rektorı Yaroslav Kuz’minov, Rusiä ğailälärneñ urtaça 20 protsentı balaların uqu yortlarına kertkändä rişwät birgän yäisä birergä äzer, di. Bu xälne barı tik uqıtuçılarnıñ xezmät xaqların arttırıp qına üzgärtep bula, dip sanıy ul. Tatarstan yäşläre üzeneñ ikençe bitendä xalıq öçen tağın ber ütä möhim temağa yazmalar urnaştırğan. Fäniä Äxmätcanovanıñ Borılış häm Öç tienlek problema digän mäqälälärendä süz toraq-kommunal xucalığınıñ reforması turında bara. Yazmalarda ul xäzergä ğadi keşe öçne äle bik tanış bulmağan, läkin kiläçäktä kiñ taralış alaçaq toraq milekçelär şirkätläreneñ närsä ikänen añlata, äle xucalıqnıñ eşe nik naçar bara digän sorawğa cawap ezli.
Gäcitneñ sişämbe sanındağı tağın ber qızıqlı temağa yazma urın alğan. Tarix niçek yazıla digän isem astında Rusiä tarixçıları aqında ğalim Aleksandr Evlaxovnıñ mäqäläse täqdim itelä. Ul anda tarixta aq taplarnıñ niçek barlıqqa kilüe, yalğan häm döreslek qay tirädä ikänlegen yaza. Ä menä İlfaq Şihapov Tatarstan yäşläre uquçılarına tatar-başqort arasındağı problemalarnı çişü yulın täqdim itä. Tatar xalqınıñ isemen tiz genä başqortqa üzgärtep, ike respublikanı berläşterergä kiräk, di ul. İsem alıştırırğa bez künekkän bit inde, iñ möhime – cisemebez üzgärmäsen, dip yaza İlfaq Şihapov. Gäcitneñ sişämbe sanında yäşlär problemaları da iğtibarsız qalmağan. Bez dip isemlängän säxifädä alar studentlarnıñ matdi xäle, berençe mäxäbbät, tönge klublar, diskotekalar turında yazmalar uqıy, xätta diskoteka süzlege belän dä tanışa alalar.
Watanım Tatarstannıñ 2 mart sanı küpçelek räsmi xäbärlärdän tora. Alardan respublika citäkçelegeneñ oçraşuları, Tatarstanda ütkän törle çaralardan tış, soñğı arada qabul itelgän qanunnar belän dä tanışıp bula. Şulay uq 14 martta uzaçaq respublika Däwlät Şurasına saylawlarğa bağışlanğan materiallar da şaqtıy Watanım Tatarstannıñ sişämbe sanında. Alardan saylawlarda qatnaşuçı säyäsi firkälär xaqında, deputat bulırğa telägän nämzätlär turında mäğlümät alıp bula. Şulay uq gäcit uquçılarnı Başqortstanda ütkän tatar Şayannar häm tapqırlar mäclese uyını belän tanıştıra, andağı problemalar xaqında yaza.
Ä menä Respublika Tatarstan gäcite räsmi yañalıqlardan tış, Tatarstanda keşe xoquqları buyınça wäkil Räşit Wağizovnıñ çığışın bastırğan. Räşit Wağizov 2003 yıldağı eşçänlegenä yomğaqlar yasıy, üzeneñ eşeneñ töp yünäleşläre belän tanıştıra.
Gölnaz İlgizär
