Accessibility links

Кайнар хәбәр

"Yukos"tan soñ çirat "Sibneft"kä citte - xakimiat milliard dollarlıq salımnarnı qaytarunı taläp itä


Törkiädän ayırmalı bularaq Rusiäneñ Yevropa Berlege belän mönäsäbätläre soñğı aralarda kierenkelänep kitte. Mäskäw bigräk tä ildäge matbuğat ireklegen qısuda, qayber ere eşmäkärlärgä qarşı qırıs çaralar kürüdä ğäyeplänä. Xäzerge waqıtta törmädä utırğan mäğlüm Xodorkovskidän soñ xäzer inde çirat ikençe ber şundıy magnat Roman Abramoviçkä citte kebek, anıñ "Sibneft" şirkätenä Rusiäneñ salımnar ministrlığı ber milliard dollarlıq salım tüläw turında xat cibärde.

Rusiäneñ salımnar ministrlığı fikerençä, 2000-2001-nçe yıllarda Roman Abramoviç çitäklägän "Sibneft" şirkäte däwlät qaznasına salımnarnı näq menä milliard dollarğa azraq tülägän bulğan. Döresräge, "Sibneft" däwlätkä aqçanı azraq tüläw alımnarın qullanğan, ministrlıq isä xäzer monı salım tüläwdän qaçu dip bäyäli häm däwlätkä tieşle aqçanı kire qaytarunı taläp itä. Şunısı qızıq - näq şundıy uq alımnarnı, qayber belgeçlär fikerençä, "Sibneft"kä qarağanda azraq qullanğan "Yukos" şirkäte prokuratura idännären inde küptännän taptıy. Ä menä Abramoviç şirkätenä xakimiat xäzer genä iğtibar itärgä buldı. Bu ike maqsatta eşlänä ala - berençedän, prezident saylawları aldınnan xalıqtağı ere magnatlarğa qarata bulğan tiskäre xislärne köçäytü häm berük waqıtta, xakimiat ğadi keşelär mänfäğäten dä qayğırta digän fikerne nığıtu öçen. Ä ikençedän, xäzer inde Putin xökümäten ber "Yukos"qa ğına qarşı köräşüdä, qanunnarnı saylap qına qullanuda ğäyepläp bulmıy. Gärçä "Sibneft"kä kilgändä, sannar beraz başqaraq, "Yukos"tan bıltır däwlät östämä räweştä 3 milliard dollar salım taläp itkän ide. "Sibneft"tan isä älegä şunıñ öçtän beren genä telilär. "Sibneft"kä qarşı kürelgän şuşı çara ildäge xakimiatneñ üz baylıqlarına yuğarıdağı säyäsi bäyläneşlären qullanıp, salım qanunnarındağı törle "tişeklär"dän faydalanıp ireşkän ere business törkemnärenä qarşı yaña höcüm başlawına işarä itä. "Sibneft"neñ neft çığarğan bar ere şirkätlär arasında salımnarnı iñ az tüläwe ser tügel, bu maqsatta ul federal'' häm cirle xakimiatneñ elekke yıllarda çığarğan, salımnarnı kimetü mömkinlegen birgän törle kürsätmä-qararların bik osta qullandı. Xäzer isä Rusiä xökümäte andıy taşlamalar yasağan bar qararların da köçtän çığardı. Salımnar ministrlığı şuña nigezlänep xäzer däwlätkä tieşle dip sanalğan aqçanı kire taläp itä. Şirkät üzeneñ Rusiä salımnar ministrlığınnan andıy taläple xatnıñ aluın rasladı, ämma berük waqıtta üzeneñ härzaman Rusiädä ğämäldä bulğan qanunnar nigezendä eşläwen belderde. Yäğni "Sibneft" ciñel genä bireşergä cıyınmıy, ministrlıq belän bäxäsen ul mäxkämädä xäl itärgä teli. "Yukos" belän bulğan waqiğälärdän soñ "Sibneft"nıñ xakimiat taläbenä buysınmıy mäxkämägä möräcäğät itüe anıñ da awır çorğa kerep baruına işarä itä. Läkin Xodorkovskidän ayırmalı bularaq "Sibneft" başlığı Roman Abramoviçkä qarşı şäxsi ğäyepläwlär älegä yañğıramadı, alar fäqät şirkätkä genä qarıy. Rusiädä ikençe bay keşe sanalğan Abramoviç moña qädär Kreml belän tınıç qına xezmättäşlek itü yulın saylağan ide. Belgeçlär fikerençä, näq menä anıñ tırışlığı belän Rusiä xökümäte "Yukos"nıñ "Sibneft" belän berläşüen tuqtata aldı. Roman Abramoviç äle haman da Çuqıt gubernatorı bulıp torsa da, soñğı 12 ayda ul üz aqçasın Rusiädän çığaru belän mäşğül ide. Abramoviç başqa ere magnatlar soñraq añlağan närsäne - Rusiädä xäzer çerep bayunıñ bik urınlı bulmawın - inde küptännän añlap aldı.

Kärim Kamal, Praga
XS
SM
MD
LG