8 nçe Mart aldınnan tatar xatın-qızlar “Aq qalfaq” ictimaği oyışması idärä utırışın uzdırdı.
“Aq qalfaq” oyışmasınıñ oyışuına inde 10 yıl waqıt ta uzıp kitkän. BTK qaramağında eşlägän bu tatar xatın-qızlar oyışmasın küp yıllar buyı Roza Tufitullova citäkläde. Xäzer “Aq qalfaq” oyışmasınıñ citäkçese Qazan şähäreneñ 2санлы tatar gimnaziäse direktorı Qämäriä xanım Xämidullina.
“Aq qalfaq“nıñ idärä äğzaları çaqırılğan bu utırışta
idäräneñ yaña yılda başqarğan eşläre turında fiker alışu buldı.
«Aq qalfaq» räise Qämäriä Xämidullina äytüençä,Tatarstannan çittä yäşäwçe millättäşlärebezneñ tuğan tel mäsällären çişärgä yärdäm itü maqsatınnan Samara şähärenä säyäxät oyıştırılğan.
Törkiäneñ Anqara şähärendä uzğan törek xatın-qızlar Qorıltayında qatnaşırğa BTK yärdämendä ictimaği oyışmadan delegatsiä qatnaşqan.
Qorıltaydağa qatnaşqan Gölzada Safiullina belän İlmira Ädiätullina anda närsälär buluı turında çığış yasadılar.
Qorıltayda bulıp qaytqannan soñ tuğan fikerläre belän Gölzada Safiullina urtaqlaştı.
“Ğomumän, böten dönya xalıqları arasında törki xatın-qızlar xäräkäte aktivlaşıp kilä. Şular arasında iñ aktivları qazax xatın-qızları häm tatar xatın-qızları. Bez Tatarstannan 5 xatın-qız idek. Bez moña söenep , ğorurlanıp qayttıq. Zur köçlär tuplap, zur eşlär eşlärgä äzerlänep qayttıq”,- dide ul. Utırışta BTK BK räise R. Zakirov xatın- qızlarnı 8 mart bäyräme uñayınnan qotlap, täbrik süzläre citkerde.
“Aq qalfaq” oyışmasına 2003 yılnıñ sentäberennän başqa tatar xatın-qızlar oyışmaları kilep quşılğan ide. Bu “Älif” ,“ Möslimä”, “Ğailä- Äni” oyışmaları buldı. R.Zakirov “BTK tarafınnan xatın-qızlar oyışmaları belän eşläw öçen ber urın buldırırğa äzermen.”- dide.
Utırışta çığış yasawçılar bik küp buldı.Häm bik küp mäs'älälär turında xatın-qızlar fiker alıştı. Fikerlär törle buldı, ämma süzlär xatın-qızlar, yäşlär balalar tiräsendä bardı.
“Xezmät veteranı” tanıqlığın alu yulları bik qatlawlı buluı turında äytelde.
Bäyräm büläge itep, yıl sayın tapşırıla torğan «Söembikä beläzege»neñ bıyıl kemnärgä täğäyenlänüen “Söembikä” jurnalı baş möxärrire Firaya xanım Bädretdinova belderde:
“Bıyıl 3 keşegä birelä. Berse Amerikada yäşägän Şämsiä Apaqayğa , tağın berse “Aq qalfaq”ictimaği tatar xatın-qızlar oyışması räise Qämäriä Xamidullinağa , ä tağın berse “ “Azatlıq”radiosı jurnalistkası Näzifä Kärimovağa”,- dide ul. Fäwziä Bäyrämovanıñ yaña ğına basılıp çıqqan “Taralıp yatqan tatar ile”dip atalğan zatlı kitabı idärä utırışında qatnaşqan här xatın-qızğa bäyräm büläge itep tapşırıldı.
Azatlıq radiosı Mälikä Basıyr,Qazan.
