Xalıqara xatın-qızlar bäyräme aldınnan İntertat.ru elektron gazetasınıñ xatın-qız xezmätkärläre iñ mäşhür ir-atlarnı bilgeläw öçen, tawış birü oyıştırdı. Bu xaqta älege elektron gazetasınıñ tatar bülegendä ayırım mäqälä dä basılıp çıqtı. Qızlar küñelenä xuş kilgän ir-atlar isemlegendä säyäsätçelär, jurnalistlar, alıp baruçılar, häm dä, tatar internetında bilgele bulğan şäxeslär dä kerde. Şuşı İntertat.ru elektron gazetasında eşläwçe qızlar 10 iñ aqıllı, iñ çibär, iñ köçle ir-atnı bilgeläp quyğan häm alar öçen tawış birgän. Bäygeneñ tärtibe häm cielğan ballar turında mäqälä avtorı Amil Nur belän äñgämä ütkärdek. Anıñ süzlärençä, berençe urınğa Färit Möxämmätşin çıqqan.:«... Qızlar anı ädäple häm söykemle säyäsätçe bularaq, berençe urınğa çığarğan. Estrada yöldızlarınnan, Salavatnı, Zölfät Xäkimne tügel, Aydar Ğalimovnı saylağan alar. Äğär bu tawış birüne global çeltärğä çığarsaq, älege isemlekkä www.yuldash.com säxifäse idärçese İlsur Ğilfanov, www.tatarlar.ru saytın alıp baruçı Timur Söläymanov, www.tatar.info saytın alıp bargan Aynur Sibğatullin ciñgän bulır ide, dip uylıym.»
Bu atnada İrek Bikinnıñ «Tatar gäzite»ndä yaña mäqälälär elende. www.peoples.org.ru/tatar adresın ciep kersägez, 2 bäxäsle säyäsi mäqälägä tap bulasıñ. Berseneñ avtorı – Ämir Yuldaşbayev häm ul yazma Başqortstandağı saylawlarğa bağışlana. Ä ikençe yazma aldağı çığışqa cawap mäqälä bulıp tora. Anıñ avtorı Damir İsxaqov. Şuşı ike mäqälä belän tanışırğa teläsägez, alarnı «Tatar gäzite»neñ berençe bitendä ezlägez.
Global çeltärdä yaña säxifä açıldı.www.mubrik.tk adresında urnaşqan älege säxifäne Nail Salimov digän Alabuğa yegete yasağan. Bu anıñ şäxsi web-säxifäse – säyäsät tä, nindider ideologiä dä monda yuq. Nail Salimov älege saytında üze belän tanışırğa täqdim itä. Häm mp3 formatında üzeneñ iñ yaratqan cırlarnı, barlıq qullanuçılarğa, buşlay alırğa röxsät itä. Anda Aydar Ğalimov, Salawat, Qazan yegetläre, Elmir Gazizullin başqaruındağı muzıkal kompozitsiälär belän tanışırğa mömkin. İdäräçe Nail Salimov yazğança, älege sayt www.tatshop.ru digän virtual kibet belän xezmättäşlek şartlarında eşli. Adresnı qabatlıym www.mubrik.tk.
BikäTimerova, bike@azaltiq.ru
