Accessibility links

Кайнар хәбәр

Tatarstannıñ iñ zatlı xatın-qızları


5 fevral'dä “Piramida” mädäni küñel açu üzägendä yaqınlaşıp kilüçe bäyräm uñayınnan “Respublikam xatın-qızlarına” dip atalğan tantanalı oçraşu oyıştırıldı. Soñğı yıllarda Tatarstan prezidentı Mintimer Şäymievnıñ respublika zatlı xatın-qızları belän oçraşu traditsiägä äylände. Konsert nomerları belän ürelep tantanada 2003 yılda “Yıl xatın-qızı. Yıl ir-yegete: xatın qız qaraşınça” bäygeseneñ näticäläre iğlan itelde. Bäygene “Tatarstan xatın-qızları” respublika cämäğät oyışması ütkärde.
“Xatın-qız Lider, cämğiät eşleklese” nominatsiäsendä iñ yuğarı urın respublika Däwlät Sovetı särkätibe Valentina Lipujina layık buldı.
“Xatın-qız – Biznes Ledi” nominatsiäsendä Aznaqay şähäreneñ “Güzäl” maturlıq salonnarı xucası Güzäl Xannanova ciñde. Bäygedä ciñüdän soñ Güzäl xanım belän qısqa ğına äñgämä oyıştırdıq. Güzäl xanım üzeneñ ğailäsenä, bigräk tä eşenä birelgän keşe. Eş anıñ bäxete, anıñ yäşäw räweşe.
“Xatın-qız – Mädäniät häm ruxi tormış” nominatsiäsendä iñ yuğarı urın Piträç rayonı uqıtuçısı häm töbäk tarix muzey mödire Anna Nikiforovağa birelde.
“Xatın-qız - Ana” nominatsiäsendä iñ yuğarı urın Tübän Qamada yäşäwçe, 9 bala anası, 17 onıq äbise häm 4 onıqçıq däw äbise Gämbäriä Salavatovağa tapşırıldı.
“Xatın-qız – Yıl ürnäge” nominatsiäsendä “Tatximfarmpreparat” oyışması laboratoriäse citäkçese Tat'yana Ğaliullina ciñde.
“Yıl ir-atı: xatın qız qaraşınça” nominatsiäsendä ciñüçe bulıp 9 nomerlı professional' litsey baş masterı Anatoliy Mex häm “Rubin” futbol komandası baş trenerı Qurban Berdiev tabılğan.
8 mart bäyräme belän prezident ayıruça Rossiäneñ häm Tatarstannıñ atqazanğan aktrisasın Alsu Ğäynullinanı qotladı. Şulay uq şäxsän prezident qotlawın şuşı könne üzeneñ 70 yıllıq yubileen ütkärgän Daniä Däwlätşina aldı. Daniä xanımğa prezident ixtiramın belderep çäçäklär tapşırdı. Daniä Salix qızı Layış rayonınıñ citäkçese, Tatarstan Yuğarı Sovet särkätibe, xatın oyışmasınıñ citäkçese bulıp eşlägän.
Prezident oçraşuda qatnaşuçılarnı häm bäygedä ciñüçelärne “8 mart – Xalıqara xatın-qızlar bäyräme belän täbrikläde häm töp ike telägen citkerde: berençedän, balalar üz analarığıznı xörmät itep, alarnı bar borçulardan saqlağız häm ikençedän, irlär sezneñ öçen - xatınnarığıznı yaratığız häm cılı iğtibar kürsätegez. Näq şulay bulırğa tieş”.
Al'bina Zäynulla, Qazan.
XS
SM
MD
LG