İnde küp yıllar buyı ütkärelep kilä torğan tatar tele häm ädäbiäte buyınça olimpiada da Rusiäneñ töbäklärendä tatar telen uquçı yäş millättäşlärebez qatnaşa. Bıyıl olimpiadada üzläreneñ belemnären sınarğa kilüçelärneñ sanı ütkän yıllar belän çağıştırğanda kübräk bulğan. Bu yulı Qazanğa Rusiäneñ 17 töbägeneñ 34 şähär häm rayonınnan 54 uquçı häm alar belän 23 uqıtuçı kilgän. Olimpiadada Başqortstannıñ Dürtile, Kuşnarenko, Awırğazı rayonnarınnan, Samar, Sarıtaw, Perm, Ästerxan, Çiläbe, Tübän Novgorod, Ekaterinburdan millättäşlärebez qatnaşqan. Bıyıl berençe märtäbä monda Tomskidan da balalar bulğan. Xäyer, olimpiadanı oyıştıruçılar – Mäğärif ministrlığı wäkilläre süzlärenä qarağanda, alar Qazanda Kurgan, Penza kebek şähärlärdän dä uquçılarnı kürergä telilär. Anda da tatar tele uqıtıla, läkin balalar älegä bu çarada qatnaşırğa teläk beldermilär ikän.
Tatar tele häm ädäbiäte buyınça bäygelärne, äytkänebezçä, Tatarstannıñ Mäğärif ministrlığı oyıştıra. Ministrlıqnıñ töbäkara xezmättäşlek bülege citäkçese Änisä Morozova älege çara häm anıñ bıyılğısınıñ başqalardan ayırmalığı xaqında menä närsälär äytte.
Bez şuşı olimpiada qısalarında sänğätle uqu bäygesen ütkäräbez.
elekkege yıllarda monda qatnaşuçı balalarnıñ uqu däräcäse bik tübän bulsa, xäzer isä uquçılar bik matur itep çığış yasadılar. Bu inde bezneñ eşneñ ber näticäse. Bıyıl bez balalarnıñ belemen bäyäläwçe jyurinı yañarttıq. Alar tulayım diärlek Tatar gumanitar institutınnan cıyıldı. Nigä disägez, Mäğärif ministrlığı tatar tele buyınça olimpiadada ciñgän uquçılarnı tatar tele belän bäyle belgeçleklärgä imtixansız kertü mömkinlegen qarıy
Äytergä kiräk, Qazan qunaqlarınıñ ber genä köne dä buşqa ütmägän. Başqalabızğa 8 martta kilep urnaşıp 11 martqa qädär, alar öçen şaqtıy bay mädäni programma da äzerlängän. Balalar häm alarnıñ uqıtuçıları Qazan belän tanışqan, Ğäliäskär Kamal teatrında spektakl’ qarağan. Şulay uq uquçılar Robert Miñnullin, yäş şağirä Luiza Yansuar belän aralaşqan. Uqıtuçılar da onıtılmağan. Alar öçen ğalimnär, täcribäle pedagoglar, ministrlıqnıñ wäkilläre belän söyläşülär, ana telen uqıtu buyınça törle mäs’älälärgä bağışlanğan seminarlar, tügäräk öställär ütkärgännär, respublikanıñ yuğarı häm urta uqu yortları belän tanıştırğannar.
Ä xäzer olimpiadanıñ näticäläre turında. Uquçılarnıñ belemen bäyälägän jyuri äğzäläre süzlärenä qarağanda, balalar şaqtıy äybät näticälär kürsätkän. Bez bolay uq bulır dip kötmägän idek, dip tä östädelär alar. Ciñüçelär häm berençelekne yawlawçılar turında Änisä Morozova söyli.
Ciñüçelär arasında Başqortstan respublikasınıñ Dürtile komandası – alar tatar ädäbiäte buyınça berençelekne yawladı häm Kirov ölkäse uquçıları – alar isä tel buyınça berençe urınnı aldı. Şulay uq Tömän, Orenbur, Mari El, Çuaşstan respublikaları balaları bik äybät näticälär kürsätte. Ä menä Samar, Çiläbe, Sarıtaw komandaları inde küptännän olimpiadalardan qatnaşıp kilsälär dä, alar älegä uñışlı çığış yasıy almıy
Olimpiadada berençe urınnı yawlağan uquçılar, teläkläre bulsa inde älbättä, kiläse uqu yılında Tatarstannıñ yuğarı uqu yortlarına tatar tele belän bäyle belgeçleklär imtixansız kerü xoquqına yä buldılar. Xäyer, ciñüçelär dä, älegä bäygedä uñışlı çığış yasamawçılar da 11 mart könne Qazannan bik qänäğät qaytıp kittelär. Çönki alar barısı da büläk yäisä institutqa imtixansız kerü xoquqın ala almasa da, üzläre öçen küp kenä qızıqlı, möhim mäğlümät aldı, Qazan belän tanıştı, millättäşlär belän aralaşa aldı. Ä ciñülär alda bulır äle.
Gölnaz İlgizär
