Bu könnärdä Sverdlaw ölkäseneñ tatarlar tuplanıp yäşi torğan yegerme ber awılında Tatarstanğa täräzä açıldı. Ölkädä yäşäwçe milli canlı, igelekle tatar yegetläre, Bötendönya tatar kongressı başqarma komitetı belän berlektä tatar awıllarında berär sputnik teleantenna häm televizor komplektın urnaştırdılar.
TNV sputnik telekanalı tapşıruların kürsätü öçen caylanğan älege komplektlar xalıq kübräk cıyıla torğan urınnarda, yäğni mäsälän, mäktäplärdä, klublarda, kitapxanälärdä, xätta qayber awıllarda mäçettä quyıldı.
Krasnoufim qalasınıñ üzendä tatar xalqınıñ iñ küp cıyıla torğan urını çäyxanä dip taptılar. Qalanıñ näq üzägendä urnaşqan tatar çäyxanäse xalıq arasında bik tanılğan urın. Biredä öçpoçmaq, bäleş, qıstıbıy kebek tämle milli rizıqlar belän genä sıylap qalmıylar, tatarça, üzebezçä itep aralaşıp utırırğa da urın bar. Çäyxanägä nigez saluçılar – Krasnoufim tatarları milli-mädäni moxtariäte räise Räsimä Safina häm rayon möselmannarı cämğiäte räise Rafail ağa Safin anı bik kürkäm, nurlı itep yasaw öçen küp köç tükkännär. Xäzer biregä çäy eçep, gäpläşep alırğa dip kilgän keşelär räxätlänep Tatarstan tapşıruların da qarıy ala.
Bäyäk Tüz awılı keşeläre komplektnı mäçetkä quyunı kiräk dip taptılar. Awılda klub häm kitapxanä bik taşlandıq xäldä, mäktäp yartı kön genä açıq bula. Ä inde üz qulları belän salınğan mäçet işekläre biredä awıldaşlar öçen härwaqıt açıq.
Urta Bäyäk, Raxman awıl kebek zur awıllarda görläp eşläp torğan kitapxanälär bu eşlär öçen qulay kürende. Ğomumän, antennanı qayda urnaştıru mä’säläsen här awıl citäkçese üz üzençäleklärenä qarap çişte.
Bu eşneñ başlanğıçında Yekaterinburgta eşläp kilüçe “Milli Media-Xolding”nı ğämälgä quyuçı tatar eşmäkärläre Rinat Sadriev, Rinat Askarov, Al''bert Afzalov tordılar. Ütkän cäy Qazan şähärendä Bötendönya tatar kongressı başqarma komitetı räise Rinat Zakirov belän oçraşqan waqıtta alar kongress tarafınnan bu eştä yaqlaw taptılar. Sverdlaw ölkäsendä urnaşqan qırıqlap tatar awılınıñ härbersendä dä urtaqlaşıp berär komplekt quyarğa kileşelde.
Äytkän süz – atqan uq, digändäy, bu yılnıñ başında “Milli Media-Xolding” ciñ sızğanıp eşkä totındı. İñ berençe eş şul uq tatar awıllarınnan çıqqan, tormışta üz yulın tapqan igelekle tatar yegetlären barlawdan başlandı. Urta Bäyäk awılınnan Rawfan Sälimov, Marat Galiev, Röstäm Yosıpov, Quyan awıldan Röstäm Gabdraxmanov, Bäyäk Tüzdän Tañsur Magasumov, Raxmanquldan İl''yas Tahirov, Tübän Äridän Bulat Xösäyenov, Tabanlı Küldän Damir Miftaxov bu eşkä bik teläp quşıldılar. Şunısı quanıçlı, tuğan cirlärenä tögäl yärdäm kürsätä alu, yaxşılıq eşläw, awıldaşlarınnan räxmät süzläre işetü bu yegetlärne aldağı könnärdä izge eşlär başqarırğa tağın da därtländerde. Bügenge köndä alarnıñ kübese “Milli Media-Xolding” citäkçeläre başlağan küp kenä proektlarda qatnaşırğa äzer ikänleklären belderdelär.
Un awıldağı sputnik teleantenna komplektı Bötendönya tatar kongressı başqarma komitetı yärdämendä quyıldı. Awıl xalqı öçen ör-yaña bulğan bu närsäne añlatıp çığu öçen, “Milli Media-Xolding” citäkçeläre antenna quyılğan awıllarda xalıqnı cıyıp, sputnik teleantennalarnı täqdir itü kiçäläre oyıştırdılar.
Tatarstan televideniese tapşıruların tatar yäşägän här yortqa citkerü proyektında äle bu berençe adım ğına. Awıllarda kabel'' suzu yäki retranslyatorlar urnaştıru bügenge köndä bik zur çığımnar taläp itä torğan eş. Andıy mömkinçelek kilep çıqqançı, bügen televizion tapşırularnı kümäk qaraw belän qänäğätlänergä turı kilä. Küp kenä awıllarda qayber qızıqlı tapşırularnı tasmağa yazdırıp, TNV tapşırularınnan fil''moteqa kebek äyber buldıru turında da süz alıp barıla. Tapşırular programmasın här keşegä citkerü öçen ölkä gazetasında yäisä rayon gazetalarında internet çeltäre arqılı aldırıp bastıru turında kileşü tözü östendä dä eş alıp barıla. Xäzerge waqıtta awıl xakimiäte başlıqları bu komplektlarnıñ tözeklege häm saqlanuı öçen cawaplı keşelär buldıru östendä eşlilär.
Ni genä bulmasın, berençe adım inde yasaldı. Bügenge köndä “Milli Media-Xolding” citäkçeläre aprel'' ayınnan başlap tağın un awılğa sputnik teleantenna komplektların quyu östendä eş alıp baralar.
Fäwiä Safiullina, Yekaterinbur
