Accessibility links

Färit Möxämmätşin yañadan spiker buldı


Comğa köneneñ töp waqiğası bulıp yaña çaqırılış Tatarstan Däwlät Şurasınıñ utırışı bulğandır, moğaen. 25 mart könne genä mandatlar alğan deputatlar, berençe märtäbä bergä cıyılışıp, eşkä kereştelär. Utırışnı iñ olı deputat Sergey Titov başlap cibärde. Berençe eş itep, alar Şuranıñ räisen sayladılar. Älege urınğa barısı 4 keşe däğwä itte – Berdäm Rusiädän Färit Möxämmätşin, Rusiä Kommunistlar firkäsennän Aleksandr Saliy häm bäysez deputatlar Aleksandr Ştanin belän Foat Komarov. Älbättä inde, bu 4 nämzätneñ kem ciñüçe buluı aldan uq bilgele ide. Alay da, nämzätlär niçek kiräk, şulay çığış yasap, birelgän sorawlarğa cawap birdelär. Däwlät Şurası räisen saylawlarnıñ näticäläre mondıy – saylawlarda qatnaşqan 95 deputattan Färit Möxämmätşinnı parlament spikerı itep 81 deputat kürergä telägän. Tatarstan prezidentı Mintimer Şäymiev deputatlarnı älege qarar belän qotladı häm alarğa eşlärendä uñışlar teläde. Soñınnan ul Däwlät Şurası deputatları aldında Yıllaq yullama belän çığış yasadı.

Comğa köneneñ başqa yañalıqları qısqaça. 25-26 mart könnärendä Qazanda Prosvesçenie näşriäte könnäre uzdı. Älege näşriät däresleklär bastıru belän şöğellänüçe iñ zur näşriät bulıp tora. Anda respublika öçen dä kitaplar basıla, şul isäptän, milli mäktäplär öçen dä. Xäyer, xäzer näşriät basma kitaplarnı ğına tügel, ä elektron uqu äsbapların da äzerli. Prosvesçenie citäkçelege Qazannıñ 155 gimnaziäsendä kiñäşmä-söyläşü ütkärde. Anda süz däresleklär turında bardı. Qazan milli mädäniät üzägendä Mäskäwdän kilgän yäş millättäşlärebez qızıqlı mädäni tamaşa täqdim ittelär. Anı Mäskäwneñ 1186 etnomädäni komponentlı tatar mäktäbe qızları oyıştırğan, dip xäbär itä İntertat.ru gäcite. Kiçädä Läysän biü häm Umırzaya vokal ansambl’läre çığış yasadı.

Gölnaz İlgizär

XS
SM
MD
LG