Accessibility links

Кайнар хәбәр

Üzbäkstanda yaña terror ğämälläre, andağı militsiä bäreleşlär alıp bara


İnde xäbär itelgänçä, Üzbäkstanda sişämbedä dä yaña terror höcümnäre oyıştırıldı. Başqala Taşkent yanındağı Kibray rayonında şartlaw ğına tügel, xakimiat islamçılar dip bäyälägän höcümçelärneñ militsiä köçläre belän bäreleşe dä bulğan dip xäbär itelä. Yäkşämbe kiçen Boxarada, ä düşämbedä Taşkenttağı höcümnär 19 keşeneñ hälak buluına kitergän ide.

Bäreleşlärneñ başqala Taşkenttan 15 çaqrım tönyaq-könçığışta yatqan Kibray rayonında buluı xaqında xäbär itelä, xörmätle tıñlawçılar. Oçraqlımı, tügelme, Üzbäkstan prezidentı İslam Kärimov torğan urın da şul tirälärdä yata. Tışqı eşlär ministrı wäkile İlxam Zakirov süzlärenä qarağanda, atışlar sişämbe irtän Üzbäkstan maxsus köçläreneñ, terror qıluda şiklänelgän qorallı törkemne "açıqlaw häm yuq itü" omtılışı waqıtında qabınıp kitkän. Şul törkemdä niçä keşe buluı bilgesez. Moñardan tış, Taşkenttağı ber Könbatış diplomatı, cirle militsiä çığanaqlarına tayanıp, maşinağa utırğan ber keşeneñ militsiä ezärlekläwennän qaçqanda üz-üzen şartlatuı xaqında xäbär itte. Älege mäğlümatlarnı bäysez çığanaqlardan raslatu Üzbäkstan şartlarında bik qıyın, läkin alar barısı da döres bulsa, andağı militsiä Taşkent häm anıñ tirälärendä terror ğämällärenä qatnaşı buluda şiklänelgän keşelärne ezläw eşen alıp bara kebek. Taşkentqa kerü çiklänelgän, uramnarda militsiä xezmätkärläre sanı arttı, şähärdäge bar balalar baqçaları sişämbedä yabıq ide dip belderelä. Atışlar bulğan urın militsiä häm ğäskärilär tarafınnan qamap alınğan. Taşkenttağı wäzğiat turında "Azatlıq" radiosınıñ andağı idaräse başlığı Räxmätcan Qudaşev menä nilär äytte.

Audio, Räxmätcan Qudaşev

"Xakimiat wäzğiat turında berni dä äytmi, ul yaq ğäskär tarafınnan çolğap alınğan, läkin bezneñ xäbärçebez xäzer şunıñ eçendä häm bezneñ belän elemtädä tora. Ul atışlarnı häm şartlawlar buluın işetkän, cirdä yatqan keşelärne kürgän, häm ul alar üle ide dip xäbär itä" di "Azatlıq" radiosınıñ Üzbäkstan başqalasındağı idaräse citäkçese. Bügenge bäreleşlärdä küpme keşeneñ ülüe xaqında räsmi mäğlümat yuq. Ä yäkşämbe häm düşämbe könnärendä bulğan şartlawlar näticäsendä Taşkent häm Boxarada 19 keşe ülgän ide. Alarnı intihar höcümçelär oyıştırğan dip farazlana, häm bu Üzbäkstan tarixında berençe märtäbä küzätelä. Taşkent häm Boxaradağı höcümnär öçen cawaplılıqnı älegä bernindi oyışma da üz östenä almadı, gärçä xakimiat şunda uq alar artında islamçılar tora dip belderde. Düşämbe kiçen däwlät televideniäse aşa yasağan çığışında prezident İslam Kärimov, misal öçen, şartlawlar çit illärdäge köçle terror üzäkläre yardämendä oyıştırılğan dip äytte.

Audio, İslam Kärimov

"Ägär dä bez uzğan waqiğälärne ber-ber artlı küz aldıbızdan ütkärsäk häm alardan sabaq alırğa teläsäk, min bu höcümnärneñ aldan uq bik yaxşı itep uylanılğanın häm çittän äzerlängänen äyter idem" di Üzbäkstan prezidentı. Şartlawlarnıñ xalıqara terrorğa bäyle buluına Üzbäkstannıñ tışqı eşlär ministrlığı da işarä itä. Anıñ wäkile Sadıyq Safaev:

Audio, Sadıyq Safaev

"Bügen inde bez, terrorğa qarşı oyışqan xalıqara berektäşlekne tarqatu tırışlqlarıı yasala dip äytä alabız, xädäflär oçraqlı räweştä genä saylanmıy" di Üzbäkstan tışqı eşlär ministrlığı wäkile Safaev. Mäğlüm ki, räsmi Taşkent Quşma Ştatlarğa Äfğanstanda "Taliban"nı bärep töşerügä yardäm itkän ide, xäzer dä äle ul amerikannarğa Xanabadtağı xärbi nığıtmadan faydalanu mömkinlegen birä. Läkin qayber küzätüçelär, soñğı höcümnär Üzbäkstannıñ Quşma Ştatlar belän tığız xezmättäşlek urnaştıruına bäyle tügel dip isäpli. Amerikada yäşäwçe üzbäk belgeçe Bahadir Fäiz:

Audio, Bahadir Fäiz

"Soñğı waqiğälär Üzbäkstannıñ şuşı höcümnärgä, Quşma Ştatlar belän xezmättäşlek itüe arqasında duçar buluın añlatmıy. Ägär dä şartlawlarnı üzbäk terrorçıları, üzbäk törkemnäre oyıştırğan ikän, bu il eçendäge, şul törkemnär häm xakimiat arasındağı qarşılıqlarnı ğına kürsätä" di Bahadir Fäiz.

Kärim Kamal, Praga
XS
SM
MD
LG