Accessibility links

Кайнар хәбәр

Qazanda iñ yaxşı uqıtuçılarnı sayladılar


5 aprel’ könne Qazanda 2003 yılnıñ iñ yaxşı uqıtuçıların sayladılar. Yäş tamaşaçılar teatrında uzğan älege bäyge başqalada här yılnı ütkärelä. Qazannıñ uqıtuçıları üzläreneñ ostalıqlarında 1999 yıldan birle sınaşa. Yıl uqıtuçısı konkursı uqıtuçılar arasında ğına tügel, ä balalar, ata-analar arasında da zur qızıqsınu uyata. Bu xaqta älege bäygene oyıştıruçılar – Qazan şähäre xakimiäteneñ mäğärif bülege xezmätkärläre dä bilgeläp üttelär. Ä anda qatnaşuçı uqıtuçılar isä, konkursnı eşlärendä iñ aldınğı kollegaları belän tağın ber tapqır oçraşıp, ber-bereñnän öyränü, täcribä urtaqlaşu da dip sanıylar. Äytergä kiräk, 5 aprel’dä Yäş tamaşaçılar teatrında uzğan tantanalı çara bäygeneñ iñ soñğı öleşe genä. Aña qädär konkursantlar şähärneñ törle mäktäplärendä uzğan 4 öleşle bäygedä ciñügä ireştelär. Şular arasınnan sişämbe könne Qazan şähäreneñ 2003 yılnıñ iñ yaxşı uqıtuçısı saylanıp aldı. Bu isemgä başqalanıñ Waxitov rayonınıñ 39 mäktäp uqıtuçısı Marina Kulagina layıq buldı. Uzğan yılnıñ iñ yaxşı tatar tele uqıtuçısı itep şähärneñ Kirov rayonınıñ 70 mäktäp pedagogı Nailä Zäynetdinova bilgelände. Ä İñ yaxşı rus tele uqıtuçısı bulıp Qazannıñ Mäskäw rayonınıñ 102 gimnaziäsennän Elena Dunaenko tanıldı. Şulay uq här nominatsiädä ikençe häm öçençe urınnar da bilgelände. Xäzer alar üzläreneñ köçlären respublika küläm bäygedä sınarğa äzerlänälär. Ciñüçelärgä 24, 12 häm 6 meñeşär sum aqçalata büläk tapşırıldı. Ayına 2-3 meñ sum alıp eşläwçe uqıtuçı öçen bu bik äybät büläk, älbättä. Läkin şunısı qızğanıç, prizlı urın yawlağan 9 ostaz arasında nibarı ber genä pedagog – ir keşe. Mäktäp haman da xatın-qızlar qulında qala birä.

Gölnaz İlgizär

XS
SM
MD
LG