İlneñ törle şähärlärendä köç qullanu bügen dä däwam itte. Amerikan xärbi köçläre wäkile general-leytenant Rikardo Sançes, şiğilär yulbaşçısı Moqtada as-Sadr'nıñ Mähdi armiäse Kut şähären tulısınça häm Najaf şähäreneñ ber öleşen üz kontrolenä aldı, dip belderde.
Bügen Ğiraq eçke eşlär ministrı Nuri al-Badran wazifasınnan kitüe turında belderde. Şuşı adımın ul üze amerikannar citäkçelegendäge koalisiäneñ anıñ eşe belän qanäğät bulmağanı belän añlattı. Şiği möselmannarı wäkile al-Badran jurnalistlarğa, amerikan idaräse – saqlanu häm eçke eşlär ministrları ikese dä şiği bulmasqa tieş dip sanıy, dide. Saqlanu ministrı itep küptän tügel şulay uq şiğilär wäkile bilgelängän ide.
Amerikan citäkçelegennän bu xäbärgä äle añlatmalar bulmadı.
Üzlären "Mocaheddin Brigadaları" dip atağan Ğiraqtağı ber törkem 3 yapon keşesen totıq itep alğanın belderde. Bu turıdağı xäbärne Al Cäzirä televnideniäse tapşırğan. Totıqlarnıñ berse – xatın-qız. Şuşı törkem – 3 kön eçendä yapon ğaskärläre Ğiraqtan çığarılmasa totıqlarnı üterü belän yanağan. Älegä Yaponiä räsmiläre bu mäğlümatneñ döreslegen tikşerä. Ğiraqnıñ könyağında tözeleştä Yaponiäneñ 550gä yaqın xärbie eşli.
Könyaq Koreanıñ tışqı eşlär ministrlığı Ğiraqta 8 korealı totıq itep alınğan, dip xäbär itte. Şulay uq bilgesez keşelär Ğiraqta xärbi bulmağan ber britan keşesen totıq itep alğan.
