Qazanğa qunaqlar kilä tora. Şuşı könnärdä başqalağa Daniädän räsmi delegatsiä kilde. Daniäneñ törle şirkät wäkilläre Tatarstan, anıñ sänäğäte belän 16 aprel’gä qädär tanışırğa niätli. Alar monda premyer-ministr Röstäm Miñnexanov belän aralaşaçaq, respublika xökümäte wäkilläre belän söyläşülär alıp baraçaq. Şulay uq Daniä qunaqları Qazan belän tanışaçaq, Älmät, Tübän Kama rayonnarın barıp qaytaçaq. 14 aprel’ könne Tatarstanğa şulay uq Tıva respublikasınıñ räsmi delegatsiäse dä kilde. Alar isä Qazanğa yubileylar, bäyrämnär ütkärü täcribäsen öyränergä kilgännär. Ni disäñ dä, başqalanıñ bu ölkädä täcribäse az tügel – Respublika, şähär könnäre diseñme, sıra bäyrämnäre diseñme – bolar barısı da bezdä bik qupşı, zur itep bilgeläp ütelä. Şuña kürä, Tıva respublikasınnan kilüçelär bu ölkädä üzläre öçen şaqtıy küp närsä belep, alıp kitärlär, dip uylarğa kiräk.
Ä menä Orenburnıñ Äsäkäy rayonınnan kilgän jurnalist Färit Noğmanovnıñ Qazanğa kilü maqsatları başqa. İsegezgä töşerep kitik, Färit äfände üzläreneñ rayonnarında ğına tügel, ä ğomumän jurnalistlar arasında şaqtıy bilgele şäxes. Äsäkäy rayon gäcitendä möselman dinenä qağılışlı mäqäläsen bastırğannan soñ, aña ekstremist, waxxabit digän isem tağıp, anı äzerlekläwlär başlandı. Färit Noğmanovnı eşennän quıp, başqa berqaya da xezmätkä almıyça, üzenä genä tügel, ä xätta ğailäsenä qarşı dä törle tiskäre ğämällär kürsätelde. Berniçä ay mäxkämä suqmaqların taptasa da, ul üzeneñ eşenä kire urnaşa almadı, sälämätlegemne häm tınıçlığımnı ğına cuydım, di jurnalist. Räxmät äle mine añlap, yärdäm itüçelärgä, alarsız miña tağın da awırraq bulır ide, dip östi Färit Noğmanov. Şulay uq ul üzen yaqlaw öçen buldırılğan İnternet sayt yasawçılarğa ayırım räxmätlären yullıy. Xäzer köndä Färit äfände jurnalistlarnıñ xoquqların yaqlawçı Sentr ekstremal’noy jurnalistiki oyışmasında eşli. Minem bu üzäkkä kilep elägüem dä näq menä şuşı säxifä arqasında buldı, di ul. Anıñ Qazanğa kilüe şuşı oyışma belän bäyle ikän.
Min üzem eşlägän Sentr ekstremal’noy jurnalistiki öçen berniçä beleşmä-doklaq äzerlägän idem. Alar inde bezneñ üzäkneñ İnternet säxifäsendä dönya kürde. Xäzer min alarnı bayıtıp bastıru öçen östämä mäğlümät cıyıp yörim. Qazanğa da şuña kildem. Respublikadağı mäğlümät çaraları xaqında beler öçen genä tügel. Qazanda bit başqa töbäklärdäge massaküläm mäğlümät çaraları xaqında da xäbärlär, mäğlümätlär bik küpBu Orenbur ölkäseneñ Äsäkäy rayonınnan kilgän jurnalist Färit Noğmanovnıñ Qazanğa säfäreneñ maqsatları ide.
Gölnaz İlgizär
