Rusiäneñ Ğädättän-tış xällär ministrlığı, timer yul qazası kiçergän Tönyaq Koreağa humanitar yärdäm cibärä. İtar-Tass xäbär itüençä 10 tonna daru-yurğan-tirmälär töyägän İl-76 oçqıçı tizdän yulğa çığa. Bügen Tönyaq Koreanıñ Rençxon şähärenä Qıtaydan berençe humanitar yärdäm kilde. Azıq-tölek, kiräk-yaraqlar töyägän 11 yök maşinası, moñarçı yabıq torğan Qıtay çigen uzıp, qaza bulğan urınğa citte. Tönyaq Korea räsmiläre äytüençä, atnakiç könne Rençxon stansiäsendä bulğan şartlaw näticäsendä kimendä 161 keşe, şul isäptän 76 bala ülgän, 1300-e cäräxätlär alğan. Şartlaw bulğan urınnıñ tirä yağı tulısınça cimerelep betkän. Räsmi Pxenyan çit illärdän yärdäm soradı.
