Accessibility links

Qazan şähär deputatları Tatar humanitar institutı möräcäğäten yaqlamadılar


Sişämbe könne Tatarstanğa Xantı-Mansi okrugınıñ xökümät citäkçese urınbasarı Vyaçeslav Novitskiy kilde. Monda ul respublika belän tanıştı, prezident Mintimer Şäymiev belän oçraşıp söyläşte. Şuşı uq könnärdä Qazanda Böyek Britaniäneñ Mäskäwdäge ilçese wäkile Endjum Nuraninıñ da räsmi säfäre däwam itä. Ul da başqalada küpsanlı oçraşular, söyläşülär ütkärde. Şunısı qızıq, anıñ äñgämädäşläre respublika citäkçelege häm sänäğät oyışmaları citäkçeläre genä bulmadı. Nurani äfände Qazanda Tatarstannıñ Diniä Näzaräte wäkilläre, jurnalistlar, studentlar belän dä oçraştı. Başqalanı şulay uq çittä yäşäwçe, döresräge eşläwçe, qazanlılar da onıtmıy. Qazanğa Rusiä Dumasına respublikadan saylanğan deputatlar kilde. 28 aprel’ könne Qazan kremlendä alar belän Mintimer Şäymiev oçraştı. Anda Rusiäneñ Federatsiä Şurası wäkilläre Filzä Xämidullin häm küptän tügel genä yañadan saylanğan İrina Laroçkina da qatnaştı. Tatarstannan 4 çaqırılış Rusiä Dumasında barısı 13 deputat eşli. Oçraşuda qatnaşqan täcribäle deputat Oleg Morozov süzlärenä qarağanda, bu qädär deputat ilneñ parlamentında äle berqayçan da bulmağan. Läkin bu küpçelekneñ eş sıyfatı niçek bulır häm deputatlar, oçraşuda Mintimer Şäymiev tä äytkänçä, respublika citäkçelege belän berläşep näticäle eş alıp bara alırlarmı – monısın inde kiläçäk kürsäter. Älegä Dumada Tatarstannan saylanğan deputatlarınıñ respublika mänfäğäten qayğırtıp çığış yasağannarı bik işetelmi. 28 apreldä Tatarstan parlamentınıñ çirattağı sessiäse uzdı. Anda deputatlar kön tärtibenä kertelgän 45 mäs’älä arasında Mäğärif turındağı qanunnı 3 uqılışta qabul ittelär häm respublikada Yäşlär parlamentın buldıru turında söyläştelär.

Qazan şähäreneñ xakimiät başlığı Kamil İsxaqov bu könnärdä Berläşkän Ğäräp Ämirlegendä yalda. Läkin ul anda da qoyaşta ğına qızınıp yatmıy. İsxaqov Tatarstan möftie Ğosman xäzrät İsxaqi belän bergä Dubay şähärendä 25-27 aprel’dä ütkän İslam şähärläre oyışmasınıñ konferensiäsendä qatnaşqan. Anıñ çaqıruı buyınça älege oyışmanıñ kiläçäk utırışı başqalabıznıñ meñyıllığı uñayınnan Qazanda ütäçäk. Şulay itep, Qazan islam dönyasında da, katoliklar arasında da, Evropada da tanıla bara, Qazan äğza bulıp toruçı xalıqara oyışmalar sanı arta bara. Läkin, nigäder, bu şähärdä yäşäw şartlarına, yullarnıñ, binalarnıñ tözeklelegenä tä’sir itmi. Axırı, älege wazğiätne üzgärter öçen başqa ğämällär dä qılırğa kiräkter. Alarnıñ nindi ikännären Qazan şähäre Şurası deputatları belergä tieşter. Kiçä Şuranıñ çirattağı utırışı xaqında bez sezgä inde söylägän idek. Bügen isä, sessiädä qabul itelgän berniçä qarar belän tanıştırıp kitäbez. Deputatlar, mäsälän, Tatar gumanitar institutınıñ rektorı Wasil Ğäyfullinnıñ älege uqu yortına şähärdä ğämäldä bulğan zur arenda bäyälären kimetü turında xatına, yuq, dip cawap birgännär. Tatarstanda näşer itelgän kitaplar belän satu itüçe az keremle kibetlär dä arenda bäyäsen kimetü turındağı möräcäğätlärenä şundıy uq cawap aldı. Küräseñ, Evropa däräcäsendäge şähärgä yärdämgä moxtaclarnı yaqlaw kileşmider.

Gölnaz İlgizär

XS
SM
MD
LG