Accessibility links

Кайнар хәбәр

Küz yäşle 9nçı May


Äxmät Kadırovnıñ häläk buluı nisbätennän Tatarstan Prezidentı Mintimer Şäymiev Çeçen Respublikası citäkçese wazifaların başqaruçı Sergey Abramovqa telegramma cibärde. “Barlıq Çeçen Respublikası häm Rusiä xalqı belän bergä tirän qayğı kiçeräbez häm faciğä öçen ğayıplelär qırıs cazasın alır dip ışanıç belderäbez”, dip äytelä bu telegrammada. Mintimer Şäymiev Äxmät Kadırovnıñ tol qalğan xatınına Diki Kadırovağa da ixlas qayğı urtaqlaşu süzlären yulladı.

Rusiä däwläte öçen iñ zur häm iñ izge kön, Ciñü bäyräme tantanaları ütkärelgändä bulğan Groznıy faciğäse Tatarstan cämäğätçelegen dä siskänderde. Düşämbe könne öylä namazında häläk buluçılar ruxına mäçetlärdä ğibädät qılındı. İkençe dönya suğışı tämamlansa da, Kavkaz yaqlarındağı suğış haman tämamlanmağanlığın iskä töşerde bu faciğä.

Keşelärne qayğı häm şatlıq berläşterä. Ciñü bäyräme xörmätenä ütkärelgän çaralar Tatarstanda kiñ qolaçlı häm mäğnäle itep oyıştırılğan ide. Citäkçelär, cämäğätçelek wäkilläre barlıq ziratlardağı batırlar häykällärenä çäçäklär saldı. Arça ziratında suğış waqıtında gospital'lärdä häläk bulğan soldatlar häm ofitserlar kümelgän qäberleklär bar. 9 Mayda şul alleyadan xärbilär saflarğa basıp kittelär. İñ zur bäyräm çaraları Yaña Savin rayonındağı Ciñü parkında buldı. Veterannarğa xörmät süzläre, suğış betep imin tormış urnaştıru mizgeleneñ ähämiäte turında fikerläre belän Mintimer Şäymiev çığış yasadı. Ul Däwlät Sovetı, xökümät, Qazan şähär administratsiäse häm üzeneñ isemennän veterannarnı häm şuşı bäyräm çaralarına kilüçelärne Ciñü köne belän täbrik itte. Biredä front yıllarınnan xäterdä qalğan cırlarnı yäşlär, balalar başqardı. Tatarstanda ikençe dönya suğışına 700 meñ keşe kitkän. Şularnıñ yartısı - 350 meñe, häläk bulğan. Teläsä nindi suğış öçen bu bik awır statistika. Tatarstanlılar häm tatarlar iñ awır xärbi büleklärdä häm iñ qatı suğışlar barğan urınnarda saper, razvedçik, istrebitel' häm başqa xätär wazifalar başqarğannar. Baltaç rayonınıñ Çepya awılınnan suğışqa kitüçelärneñ 85% yañadan äylänep qaytmağan. Qısqası, Tatarstanlılar häm tatarlar öçen bu küz yäşle bäyräm bik tetränderä torğan waqiğa. Brest kreposten saqlawçılar komandirı, keräşen tatarı, Piträç awılınnan kitkän Petr Gavrilov, şulay uq Ğazinur Ğafiätullin, Ğäziz Zahitov, Mixail Devyataev kebeklärneñ isemnäre böten dönyağa bilgele. Xäzer arabızda yäşäwçe veterannar torğan sayın kimi bara. Şunısı xaq, suğış veterannarın zurlıylar, alarğa fatirlar, maşinalar birelä, bäyrämnär oyıştırıp, buşlay könküreş xezmäte kürsätep, alarnıñ küñellären yuatalar. Läkin barıber suğış qazasın kürüçelär qayğısın onıta almıy. Bu suğış faciğälären küz yäşe belän dä, aqça belän dä ülçäp bulmıy.

Rimzil Wäli

XS
SM
MD
LG