Çärşämbedä Mäskäwdä ingliz telendä çığa torğan "Moscow Times" basmasında, "Başqort äçetkesendäge xakimiat vertikale" digän mäqälä çıqtı. Mäğlüm jurnalist Yuliä Latınina yazğan şuşı mäqälä ike kön elek "Novaya Gazeta" basmasında inde ber dönya kürgän ide, xäzer isä anı inglizçägä tärcemä itep "Moscow Times" ta bastırdı, şulay itep anıñ eçtäleğe belän Rusiädän çittä dä tanışu mömkinlege tudı. Urısça "Başqortstanğa kergän Rusiä", ä inglizçä "Başqort äçetkesendäge xakimiat vertikale" dip atalğan şuşı mäqälädä süz Ufadağı citäkçelekneñ respublikadağı tärtipne Rusiä qanunnarına nigezlänep tügel, ä üze niçek teli şulay urnaştıruı xaqında bara. Federal' üzäkkä işarä itep Yuliä Latınina, xakimiat bar ilne qulında tota almasa qayber töbäklärne xanlıqlarğa äwerelderä dip yaza. Andıy töbäklärdä cirle qüwät oyışmaları yanıçarlarğa äylänep, küpme kürgän rusiälelärne dä ğäcäpländererlek eşlär eşli başlıy di Latınina häm bu uñaydan Başqortstandağı eçke eşlär ministrlığınıñ öç tapqır xökem itelgän ber keşe citäkçelegendäge xäyriä fondı belän kileşü tözep, aña aqça cıyu eşendä militsiä köçlären qullanu oçrağın iskä töşerä. Ministr urınbasarları üz qulları belän törle şirkätlärgä xatlar yazıp, şul xäyriägä küpme aqça küçerü turında kürstämälär birep yatqan dielä mäqälädä. Latınina fikerençä, Başqortstan Rusiägä, Kokand xanlığı niçek patşa Rusiäsenä kergän bulğan, şul däräcädä genä kerä. Räsmi töstä ul Rusiäneñ 89 töbägeneñ berse, läkin anda bötenläy başqa tärtiplär. Mäskäw Kremlendä başqort prezidentına barı tik säyäsi maqsatlardan çığıp qına tüzälär, kiräk bulsa ul Rusiä prezidentın saylağanda 105% yaqlaw tä'min itä ala di Latınina. "Moscow Times" mäqäläsendä ul, Mäskäw Başqortstandağı wäzğiat belän asılda ber dä qänäğät tügel ide, şul säbäple respublikada bıltır uzğan saylawlarda Räximovnıñ köndäşe Mejprombank başlığı, Kreml'gä yaqın Sergey Pugaçovnıñ yaqın köräştäşe Veremeyenko päydä buldı, ul ikençe turğa da çıqtı, şunnan soñ Räximov tiz genä Mäskäwgä barıp Putin belän şaqtıy ozaqqa suzılğan söyläşüdä bulıp qayttı, annarı inde Ufağa Veremeyenko köräşen tuqtatu turında ämer kilde dip yaza. Monıñ şartı itep Mäskäw, respublikadağı nefteximiä şirkätlären "Gazprom"ğa tapşırunı quyğan bulğan digän süzlär yöri dip yaza Yuliä Latınina. Bazardan alınğan xäbärlärgä qarağanda, "Gazprom"ğa älegä berni dä kilmägän. Üzen mal-mölkätkä awıştırğan xakimiat axırğı çiktä şul maldan da, annarı inde xakimiatennän dä qorı qala di Latınina, "Moscow Times" häm "Novaya gazeta" basmalarında çığarğan häm Başqortstan citäkçelege turında yazğan mäqäläsendä.
Kärim Kamal
