Misır prezidentı Hösni Möbäräk bügen 3 könlek Mäskäw säfären tämamladı. Kiçä Möbäräk Rusiä prezidentı Putin belän oçraştı, söyläşülär Ğiraqtağı wazğiät häm İsrael-Fälestin nizağı turında bardı. İtar-Tass mäğlümat agentlığı xäbär itüençä, ike citäkçe – Ğiraqtağı xakimiät 30nçı iünnän soñ tulısınça ğiraqlılar qulında bulırğa tieş, dip kileşkän. Mäskäwneñ Xalıqara Mönäsäbätlär İnstitutınnan Möbäräkkä büläk tapşırıldı, ul üz çiratında Misır belän Rusiä arasında xezmättäşlekne arttırırğa çaqırdı.
