Accessibility links

Qazanda «Altın bitlek» festivale atnalığı başlandı


Älege däräcäle teatr bülägen birä başlağanına bıyıl 10 yıl tuldı. Şuşı yubileyğa bağışlap «Altın bitlek» büläge lawreatları Rusiä ölkäläre buylap gastollärdä yöri. 31nçe maydan başlap 7 iyüngä qädär Qazan tamaşaçıları Rusiä teatrlarında quılğan iñ yaxşı äsärlärne kürä alaçaq.

Kamal teatrı säxnäsendä moña qädär dä urıs telle teatrlarınıñ uynağanı bar ide. Opera häm balet teatrında yañartu eşläre betmägändä, xätta Şalyäpin festivale dä tatar teatrı säxnäsendä ütte. 1-2 Mäskäw artistınıñ da, Qazan xalqında tamaşa kürsätep kitkäne buldı. Ämma bu yulı uynalğan häm äle uynalası äsärlär bötenläy başqa sıyfatta buldı. 31 may kiçendä Yuriy Yeremin quyğan «Kömeş çor» äsäre kürsätelde. Töp rol’lärne Ol’ga Ostoumova, Georgiy Taratorkin uynadı. Pyesada 1949 yılğı xällär taswirlana. Waqiğalar ber kommunal fatirda häm anda yäşäwçe keşelär tiräsendä bara. Äsärdä kürsätelgän: yarlılıqtan oyalmağan rässam, awır zamanda da baylıq tuplıy belä torğan eşmäkär, aqnı qaradan äle ayır ğına başlağan yäş şağir-eget, anıñ änise, kömeş çor şağirläre belän mawığıp yäşi torğan kitapxanäçe qız - üz yazmışları aşa älege mixnätle zamannı çağıldıra aldı.

Qazan tamaşaçıları äsärne, alqışlap qabul itte. Tanılğan artistlar baş iärgä çıqqanda zaldağılar alarğa, ayaq ürä basıp, qul çaptı.

Soñınnan säxnägä räsmi keşelär çığıp, «Altın bitlek» atnalığınıñ başlanuı turında iğlan itte. Premyer-ministr urınbasarı Prezidentnıñ festival’ne sälämäläw xatın uqıp birde. Anıñ äytüençä, «Altın bitlek»

Tatarstan öçen tanış äyber, ul Kamal teatrı rejisserı Marsel Sälimcanovqa häm Tatarstan Prezidentı Mintimer Şäymievqa birelgän ide. Bıyıl bitlekne alğan Çulpan Xammatova, Qazan qızı bulğanğa kürä, «Altın bitlek» büläge Tatarstanda 3 tapqır birelde dip sanarğa bula, dide vitse-premeyer.

Älege atnalıqta tağın «Altın Bitlek» büläge iäse, Piterbur qurçaq teatrı artistı Elina Ağeeva başqaruında «Zolushka» äkiäte kürsäteläçäk. Şulay uq, Ekateriburdan biü teatrları çığış yasar dip kötelä, atna axırında Mäskäw teatrı, Aleksandr Kolägin qatnaşlılığında, Şekspir äsären kürsätäçäk.

Bikä Timerova.

XS
SM
MD
LG