Accessibility links

Кайнар хәбәр

Gäcitlär üzläre telägänne yaza


Atnalıq möstäkıyl' gäcitlär soñğı waqıtta tämäkeneñ zıyanı turında irkenläp yaza. “Ömet” gäcitendä yazılğança, 15-17jäşе tulmağan yegetlärneñ 60% häm qızlarnıñ 36% tämäke tarta. Bu statistikağa ışanuı da qıyın. Tartuçı yäşüsmerlär isäbe buyınça Tatarstan Rusiädä dürtençe urında tora ikän.
Miläwşä Sölimcanova küptän tügel uzıp kitkän tämäkegä qarşı köräş könendä kibetlärgä çığıp, baliğ bulmağannarğa tämäke satasızmı, dip sorağan. “Abıy tämäke alıp bir äle” dip isemlängän mäqälädä äytelgänçä, satuçılar plan tutırırğa kiräk bit, ä yäşüsmerlär barıber taba, olılardan bulsa da aldıra, digän fikerlär işetelgän. Tartuçı balalarnıñ üzäk nerv, yöräk-qan sistemasına kiterelgän zıyan häm şulay uq organizmnıñ matdälär almaşı bozılu da mäğlum. Häm avtor xalıqnıñ tartuı däwlätkä tabışlı digän näticägä kilgän.
“İzvestiä Tatarstana” gäcitendä basılğan mäqälädä Rusiädä qabul itelgän tämäkegä qarşı zakon turında yazılğan. Könbatış illäreneñ kübesendä tämäkegä qarşı Ramoçnaya konvensiä WOZ isemle dokument qabul itelgän. Rusiädä isä däwlätne tämäke tötene qaplap kitü qurqınıçı buluğa qaramastan, Konvensiäne qabul itärgä aşığuçılar kürenmi, dielä bu yazmada. Qısqası, tämäkegä qarşı qanun bar, läkin ul ütälmi.
Bäysez gäcitlärneñ şundıy ğädäte bar, alar räsmi xakimiät wäkilläreneñ eşçänlegenä tänqit belän qarawların yäşermilär. “Zvezda Povolj'ya” gäcitendä Qazan başlığı Qamıl İsxaqovnıñ Räfqat Altınbaev belän qulğa qul totınışıp töşkän räsemnäre basılğan. Bu inde üzenä kürä säyäsi kinayä.
Dürt yıl elek Rusiädä tözelgän 7 federal' okrugnıñ maqsatların häm nindi näticä kiteräçägen küzallap älege vertikal' turında kem genä kinayäle süzlär äytmäde. Bigräk tä däwlät çinovnikları. Cirle xakimiät häm milli xäräkät 7 federal' okrugnı tözü milli respublikalarnı yuqqa çığaru öçen kiräk, dip sanıy. Ämma xäzer apparat xezmätkärläre yäki deputatlar turıdan turı okruglarğa häm federal' inspektorlarğa tel tidermi. Räsmi matbuğat ta federal' inspektorlarnı fälän cirdä buldı, fälän närsä äytte dip äytep kitälär. Yäki bötenläy lämmim, ber süz dä äytelmi. “İzvestiä Tatarstana” gäcitendä basılğan «Geografiäneñ dürt yıllıq tarixı» digän mäqälädä Vadim Yegorov Tatarstan buyınça federal' inspektor Marsel' Ğalimardanovnıñ eşçänlegenä analiz yasağan. Avtornıñ qaraşınça, okrug xezmätkärläre waq-töyaq çaralarda qatnaşuın, keşelärgä ällä ni kiräk bulmağan ğämällär qıluın yazğan. Ğädättä, respublika citäkçelegen çemetkäli torğan bu gäcittä, federal' okruglar smotryaşçiy yäğni küzätep toruçı vazıyfasın başqara. Ägär dä Marsel' Ğalimardanov yäki Sergey Kirienko bu mäqälägä cawap bastırıp çığarsa, radio aşa sezgä işetterergä mömkinlek tuaçaq.
Al'bina Zäynulla, Qazan.
XS
SM
MD
LG