Respublikada 2004 yılnıñ ikençe yartıyıllığına gäcit-jurnallarğa yazılunıñ soñğı könnäre bara. Respublika matbuğatına yazılır öçen 13, ä üzäk gäcit-jurnallarğa - nibarı ber genä kön qaldı. Räsmi mäğlümätlärgä qarağanda, matbuğatqa yazılu ällä ni äybät barmıy. Yün urtalarındağı näticälär şunı kürsätälär – 2003 yılnıñ ikençe yartıyıllığı belän çağıştırğanda bıyıl nibarı 63 protsent qına yazıluçı terkälgän. 17 yün könne Tatarstan poçtası idäräse tarafınnan Yazıluçı köne ütkärelde. Ul törle matbuğat çaralarınıñ redaksiäläre belän bergälektä yılğa berniçä märtäbä uza. Bu yulı älege çarada 20läp gäcit-jurnallar qatnaştı. Alar arasında Qazan, Miras, Sabıyğa, Yalqın jurnalları, Mädäni comğa, Watanım Tatarstan, Tatarstan xäbärläre, Kazanskie vedomosti, Vostoçnıy ekspress häm qayber üzäk gäcitlär bar ide. Şuşı redaksiälärneñ wäkilläre Qazannıñ Kreml uramında urnaşqan Üzäk poçta bülege binasına kilgän keşelär belän aralaştı, üzläreneñ gäcit, jurnalları belän tanıştırdı, alarnıñ qayber sannarın tarattı. Buşlay bulğaç, kilüçelär alarnı ber-bersennän tartqalap, küpläp aldı. Qayberäwlär matbuğatqa yazılmasalar da, ber-ike ay uqırlıq äyber cıyıp kittelär.
Yazıluçılar könendä, inde äytkänebezçä, tatar matbuğat çaraları wäkilläre dä qatnaştı. Alar Yazıluçı könendä küp kenä qızıqlı çaralar ütä, jurnalistlar üzläreneñ uquçıları belän tanışa, büläklär uynatıla, läkin tatar matbuğatı öçen anıñ ähämiäte yuq diärlek, dip sanıy. Bälki şuñadır da, Yazıluçı könendä qatnaşuçı redaksiälärneñ sanı ällä ni küp tügel. Läkin Tatarstan poçtası idäräseneñ matbuğat üzäge citäkçese Tatyana Yan’kova süzlärenä qarağanda, bu çara şaqtıy uñışlı ütä. Başqa könnär belän çağıştırğanda, bu könne gäcit-jurnallarğa yazılu 7-8 märtäbägä arta, di ul. Älege çara waqıtında yazılunıñ üzençälege dä bar. Qaysı cirdä genä yazılsa da, yazıluçı redaksiälär tarafınnan uynatıla torğan büläklärgä ömetlänä ala. 17 yün könne, kiçke säğät 6da Üzäk poçta bülegendä büläklär uynatılaçaq.
Gölnaz İlgizär
