Accessibility links

Кайнар хәбәр

Här bala bäyrämgä layıq


Respublikada çığarılış kiçäläre çorı. Şundıy kiçälärneñ berse pänceşämbe könne Tatarstannıñ säwdä-sänäğät palatasında uzdı. Läkin anıñ başqalardan ayırması da bar. Respublikanıñ säwdä-sänäğät palatasında 24 yün yätim häm fizik mömkinçelekläre çiklängän balalar üzläreneñ mäktäpne tämamlaw turında tanıqlıq aluların bäyräm ittelär. Älege kiçäne respublikanıñ Mäğärif ministrlığı oyıştıra. Yätim häm awıru balalar öçen bu bäyrämne oyıştıruda Mäğärif ministrlığınnan tış respublikanıñ säwdä-sänäğät palatası da zur üleş kertkän. Alarğa Neçkäbil ictimaği oyışması, İKEA kibete, İnfans’ya i futur şirkäte, Rubin komandasınıñ kapitanı Sergey Xarlamov häm başqalar bulışqan.

Kiçägä respublikanıñ 17 rayonınnan 100 yäşüsmer kilde. Alar arasında urta mäktäpne altın medal’gä tämamlağan Aznaqaydan Minzilä Äğlämova, Qazannan Viktoriä Borisova, Olesya Ponyatova, kömeş medal’gä layıq bulğan Qazan yegete İlnur Şäydullin, sport yarışlarında zur ciñülärgä ireşkän Bögelmädän Artur Ğabdraxmanov, Aznaqaydan Lenar Sabirov, Dinar Möxämmädiev, icadi sälätläre belän tanılğan Yäşel Üzännän Asiä Nasakina, Olesya Xäyrullina häm başqalar. Ğomumän, älege kiçägä respublikanıñ barlıq balalar yortınnan häm mäktäp-internatlarınnan iñ sälätle, aqıllı, aktiv uquçılar cıyılğan ide.

Alarnı qotlarğa respublika xökümäte, Däwlät Şurası wäkilläre, iğänäçelär kilgän ide. Kilüçelär balalarğa qotlaw süzläre, matur teläklär genä äytep qalmadılar, büläklär dä tapşırdılar Mäsälän, premyer-ministr urınbasarı Zilä Wälieva respublika isemennän här balağa fotoapparat tapşırdı. Üzeneñ çığışında ul şulay uq kiçädä qatnaşuçı balalarğa qıyın waqıtlarında bügenge bäyrämne oyıştıruçılarğa möräcäğät itärgä täqdim itte. Alar sezgä hiçşiksez bügenge kebek yärdäm qulı suzarlar, dide ul. Üz tormışlarına awırlıqlar, qıyınlıqlar belän yış qına yözgä-yöz qalğan awıru häm yätim keşelär öçen bu iñ zur büläk bulır ide, älbättä. Bigräk tä, wäğdä itelgän yärdäm çınlap ta kürsätelsä.

Gölnaz İlgizär

XS
SM
MD
LG