Accessibility links

Qazanda tatar yäşläre kiñäşläşä


Respublikada 26 yün – Xalıqara narkomaniä belän köräşü könen bilgeläp ütärgä äzerlänälär. Şimbädä şuşı uñaydan 200 keşe qatnaşlığında veloçabış uzaçaq, Qazan milli-mädäni üzäge qarşında Bez sälämät, quşılığız, dip isemlängän tamaşa bulaçaq. 27 yündä isä, Tatarstan yäşläre Bötenrusiä Yäşlär könen bilgeläp ütäçäk. Ä menä Qazanğa cıyılğan tatar yäşläre bäyräm itülären dä, eşlären dä däwam itälär. İnde xäbär itkänebezçä, başqalada 24 yünnän başlap Tatar yäşläre forumı uza. Pänceşämbedä alar Qazan belän tanıştı, ä könneñ ikençe yartısında tatar zıyalıları belän aralaştı. Yäş millättäşlärebez belän oçraşuğa yazuçı Tufan Miñnullin, şağirlär Gäräy Räxim, Rezidä Wälieva, rejisser Färit Bikçäntäev, Kamal teatrı direktorı Şamil Zakirov qatnaştılar. Kiçädä şiğerlär yañğıradı, tatar ädäbiäteneñ xäle, teatrnıñ milli ğöref-ğädätlärne saqlap qaludağı role häm millät aldında torğan başqa şundıy aktual’ mäs’älälär turında süz bardı. Kiçädä yäşlärgä qarağanda kübräk olılar söyläde. Bu bälki forum delegatlarınıñ yuldan ğına bulıp, inde arularınnan da bulğandır. Xäyer, yäşlär tarafınnan qızıqlı, ütken sorawlar da birelde. Alar xäzerge yazuçılar äsärläreneñ xalıqta yañğıraş tapmawı, tatar teleneñ betep baruı xaqında da äyttelär. Şul uq könneñ kiçen uzğan konsertta da qunaqlarnıñ sülpänräk buluları, cırlarğa, biergä bik aşqın tormawları da yäşlärneñ arğanlığı belän añlatıldı. Çınlap ta, qayberäwlär yuldan kilgäç yuınıp çığa almawlarına da, berençe könne ük artıq küp çaralar ütüenä dä zarlandı.

Xäyer, andıylar küp bulmadı. Ni disäñ dä, alar bit monda yal itärgä kilmägän. Şuña da, comğa irtän ük forumnıñ seksiä utırışlarına delegatlar waqıtında cıyıldı. Barısı Tatar yäşläre forumı qısalarında– Milli mäğärif häm fän, Mädäniät häm ruxi miras, Eşlekle xezmättäşlek, Yäşlär häm din, Tatar dönyasında mäğlümäti-elemtä texnologiälär dip isemlängän 5 seksiä eşläde. Delegatlar üzläre telägän tarmaqnı saylap, şulardağı söyläşülärdä qatnaştı. Tel, ädäbiät, sänğät institutında uzğan Milli mäğärif häm fän seksiäsendä Tatarstannıñ Ministrlar Kabinetınıñ bülek citäkçese Kim Miñnullin, Mäğärif ministrı Fariz Faxrazov, däwlät universitetınıñ tatar filologiäse häm tarixı fakul’tetı dekanı İskändär Ğiläcev, ğalim Damir İsxaqov, Mäskäw, Stärletamaq, Tömän wäkilläre çığış yasadılar. Alar respublikada tellär säyäsäte, yäşlärgä milli tärbiä birü, tatar ensiklopediäse, telne üsterü, yäşlär arasında tatar teleneñ xäle xaqında söyläşte.

Milli mäğärif häm fän seksiäsendä qatnaşuçı delegatlar monda kübräk olılar ğına söyläde, yäşlärneñ fikere işetelmäde, dip zarlansa, Tatar dönyasında mäğlümäti-elemtä texnologiäläre bülegendäge fiker alışuda yäş millättäşlärebez dä bik aktiv qatnaşqan. Mädäniät häm ruxi miras seksiäsendä dä söyläşü bik qızıqlı häm aktiv bulğan. Bu älege seksiäneñ alıp baruçısı İnsaf Xämitov yäş buın wäkile buluğa da bäyle bulğandır. Monda milli kinematograf, anıñ zäğiflege, milli mädäniätkä yäşlärne cälep itü turında süz barğan. Ä menä Yäşlär häm din seksiäseneñ isemendä ük Yäşlär iseme bulsa da, monda da kübräk olılar süzen tıñlağannar. Yazuçı Fäwziä Bäyrämova häm Tatarstan Diniä Näzaräte räise urınbasarı Wäliulla Yaqub citäkçelegendä monda cämğiättä dinneñ role, rus teleneñ mäçetlärgä dä ütep kerüe xaqında söyläşkännär. Qazan yärminkäsendä uzğan Eşlekle xezmättäşlek seksiäsendä isä Tatarstannıñ başqa töbäklär belän iqtisadi xezmättäşlege, tatarlarnıñ eşlekle bağlanışları, tatar eşmäkärlege xaqında süz bardı.

Köndezge säğät öçtä Yäşlär forumınıñ delegatları häm qunaqları Salix Säydäşev isemendäge Zur konsertlar zalında plenar utırışqa cıyıldı. Monda alarnı Tatarstan prezidentı Mintimer Şäymiev isemennän Däwlät Şurası räise Färit Möxämmätşin sälämläde. Ä Bötendönya tatar kongressı citäkçese Rinat Zakirov, respublikanıñ Yäşlär eşläre buyınça ministrı Marat Bariev zur çığış yasadı. Annan soñ forumda qatnaşuçı Belarus, Qazaqstan respublikaları, Mäskäw, Çallı, Samar, Tömän, Stärletamaq, İjaw şähärläre wäkilläre süz aldı. Plenar utırışta şulay uq Yäşlär forumınıñ Başqarma byurosı saylandı. Anıñ citäkçese itep Qazannan saylandı. Kiçen forumğa cıyıluçılar şul uq Zur konsertlar zalında respublika sänğät ostalarınıñ konsertın qaradı. 26 yün könne forum üzeneñ eşen däwam itäçäk. Bu könne Qazan qunaqları Yoşkar-Ola şähärendä uzaçaq federal Sabantuyda qatnaşaçaq.

Gölnaz İlgizär

XS
SM
MD
LG