Şuşı könnärdä genä Qazanda ber qızıqlı fänni söyläşü uzdı. Yal könnäre, Tatar yäşläre forumı bulu säbäplederme, ul iğtibardan çittäräk qaldı. Läkin XXI ğasırda tatar milläte üseşeneñ töp yünäleşläre dip isemlängän konferensiäneñ teması, isemennän ük kürengänçä, bik qızıqlı häm möhim. İke kön däwamında barğan älege fänni konferensiä tatar milläte üseşe konsepsiäsen äzerläw qısalarında ütkärelde. Anda Rusiä töbäklärennän tatar ğalimnäre qatnaştı. Bu cıyılışnıñ ähämiäte, anıñ maqsatları turında konferensiäne oyıştıruçılarnıñ berse – ğalim Damir İsxaqov fikerläre.
Bu konferensiä bik möhim häm ähämiätle çara buldı, çönki bezneñ inde küptän Rusiä töbäklärennän ğalimnärne cıyıp, ildä xäzerge etno-säyäsi, etno-mädäni wazğiätkä analiz yasağan yuq ide. Bu cıyılışta Başqortstannan, Mordoviädän, Sankt-Peterburgtan, Tömännän, Ästerxannan, Penzadan wäkillär qatnaştı. Bez tatar milläteneñ identlılığın üsterü, bügenge mäğlümät çaralarında tatarofobiä, tatardan qurqu oçraqları temasın tikşerdek. Şulay uq seber tatarlarınıñ problemaları da qaraldı. Nik disäñ, alar tatar xalqınıñ şaqtıy üzençälekle törkeme bulsa da, alarğa xas problemalar başqa cirlärdä dä oçrıy. Annan tış, tatar gumanitar fänendä qaralmağan mäs’älälär dä tikşerelde bu cıyılışta. Mäsälän, tatar ädäbi tele häm anıñ dialektlarınıñ bäyläneşe kebek problema iğtibar üzägendä buldıĞalim, etnolog Damir İsxaqov XXI ğasırda tatar milläte üseşeneñ töp yünäleşläre dip isemlängän konferensiä xaqında menä nindi fikerdä tora.
Gölnaz İlgizär
