Bu çara Yaña ğasır dulqınnarında bezneñ radionı translyatsiäläwgä ber yıl tuluğa bağışlandı. Azatlıq belän Yaña ğasır radiolarınıñ xezmättäşlege nibarı 1 genä yıl barsa da, alar arasında inde şaqtıy nıq xezmättäşlek urnaştı. Şuña da, Azatlıq radiosı könen Duslıq bäyräme dip tä atadılar. 1 yüldä kön däwamında Yaña ğasır dulqınnarında tıñlawçılar Azatlıq radiosınıñ tatar-başqort redaksiäse xezmätkärläre belän äñgämälär işettelär, radionıñ tarixı belän tanıştılar, Azatlıq radiosında çığıp kilüçe programmalar xaqında beldelär. Praga şähärendä urnaşqan radiobıznıñ töp redaksiäse belän radioküper dä oyıştırıldı. Anıñ yärdämendä tıñlawçılar Färit İdelleneñ fikerlären işetä aldılar. Şulay uq alar radiobıznıñ jurnalistları belän turı efirda da aralaştılar. Qazannan Rimzil Wäli, Pragadan Naif Aqmal tıñlawçılarnıñ sorawlarına cawap birdelär.
Xäyer, sorawlarğa cawaplarnı 1 yül könne jurnalistlarğa ğına ezlärgä turı kilmäde. Azatlıq radiosı belän qızıqsınuçılar öçen bez bäygelär dä ütkärdek. İrtänge efirda bezneñ sorawlarğa döres itep cawaplarnı berençelärdän Qazannan Gölnaz Xuciäxmätova birde. Näq menä ul Azatlıq radiosı tarafınnan oyıştırılğan bäygeneñ berençe ciñüçese itep tanıldı. Aña radiobızdan istälekle büläklär tapşırıldı. Bäyge kön däwamında bardı häm anıñ töp ciñüçeläre älege programma äzerlängändä äle bilgele tügel ide. Alar belän bez sezne kiläse tapşırularıbızda tanıştırırbız. Läkin sorawlarnıñ qayberäwlärenä genä cawap tapqan tıñlawçılarıbız da istälekkä Azatlıq radiosınıñ simvolikası töşerelgän keçkenä küçtänäçlärgä iä buldı. Radiobıznıñ tıñlawçıları üz täqdimnären dä citkerdelär.
1 yüldän Yaña ğasır radiosı Azatlıqnıñ tapşıruların kiçke säğät 9da retranslyatsiäli başlıy. Dimäk, moña qädär 23 säğättä başlana torğan programma ike säğät aldanraq başlanaçaq. İrtän 5 başlana torğan tapşıru isä ğädättäge waqıtında efirğa çığaçaq. Östäwenä, Azatlıq radiosın qısqa dulqınnarda häm Tatarstan radiosı aşa da tıñlap bula. Tatarlar küpläp yäşi torğan qayber Rusiä töbäklärendä dä radiobıznı retranslyatsiäläw oyıştırılğan. Mäsälän, Çiläbe ölkäsendä millättäşlärebez bezne Kontiniental’ radiosı aşa tıñlıy ala. Ä menä Perm’ ölkäseneñ tatarlar bik oyışıp yäşi torğan Bardada Azatlıq radiosı tıñlawçılarğa rayon radiosı dulqınnarı aşa kilep ireşä. Retranslyatsiäne monda rayon xakimiäte yärdämendä oyıştırğannar. Şulay itep, Azatlıq radiosı tıñlawçılarğa yaqınaya bara.
Gölnaz İlgizär
