Accessibility links

Кайнар хәбәр

YUKOS üz bälaları öçen prezident Putinne ğäyepli


Sişämbe könne Rusiä finans ministrınıñ urınbasarı Sergey Şatalov, xökümät YUKOSnıñ burıçların tüläw tärtiben üzgärtä ala dip belderde. Anıñ şuşı süzlärennän soñ, YUKOSnıñ soñğı aralarda haman töşä barğan aksiälärenä bäyä kütärelä başladı. Läkin ikençe yaqtan YUKOS citäkçeläreneñ berse "Financial Times" basmasında, YUKOSnıñ xälen yaxşırtu turında xökümät belän barğan söyläşülärne özüdä prezident Putinne ğäyepläp çıqtı.

Başta finans ministrı urınbasarı Sergey Şatalov belderüe turinda, xörmätle tıñlawçılar. Ul sişämbedä, xökümätneñ YUKOSqa bulışa alu ixtimalına işarä itsä dä, monıñ älegä teoretik yaqtan ğına mömkin buluın äytte. "Wäzğiat ber dä ğädäti tügel, şuña kürä dä andıy yardäm ixtimalın bötenläy kire qağıp bulmıy" dide Rusiäneñ finans ministrı urınbasarı. Anıñ süzlärenä qarağanda, monıñ öçen xökümätneñ maxsus qararı qabul itelergä tieş, YUKOS burıçların tüläw tärtiben üzgärtü asılda iqtisadi ğına ber ğämäl bulsa da, monı barı tik säyäsi qarar nigezendä eşläp bulaçaq. Yäğni, moña iñ yuğarı däräcäle fatixa kiräk digän süz. Andıy fatixalarnı Rusiädä xäzer barı tik ber genä keşe birä. Näq menä anı, YUKOSnıñ töp citäkçelärennän berse Bruce Misamore, şirkätneñ xökümät belän alıp barğan söyläşülären özüdä ğäyepläde. "Financial Times" basmasına ul, wäzğiat şul xätle bilgesez, häm bar ildä monıñ öçen cawaplılıq barı tik ber genä keşegä - Putin äfändegä yöklänä ala, YUKOS problemasın ul başladı häm barı ul ğına anı xäl dä itä ala dip belderde. Misamore süzlärenä qarağanda, şirkät üz xälen yaxşırtu, eşne bölgenlekkä citkermäw maqsatında Rusiä xökümäte belän söyläşülär başlap cibärgän bulğan. Başta äybät kenä barğan şuşı aralaşu uzğan atna başında kinät tuqtap qalğan. Häm Bruce Misamore, xökümät käyefeneñ şulay üzgärüe, YUKOSnı bölgenlekkä citkerü qurqınıçın tudırdı dip belderä. Qayçandır Rusiäneñ iñ keremle, iñ qulay eşläwçe şirkäte sanalğan YUKOSnı xakimiat salımnar tüläwdän qaçuda ğäyepli. Ber 2000-nçe yıl öçen genä ul xäzer däwlätkä 99 milliard sum tieş dip belderelä. Ul arada salım politsiäse YUKOSnıñ 2001-nçe yıl tülämi qalğan salımnarı külämen dä yaqınça şul uq summağa, 98 milliard sumğa çığardı. Düşämbe könne un xalıqara bank kergän finans törkem YUKOSnıñ 1 milliard dollarlıq kreditın kire tüli almawın xäbär itte. Asılda bu, şul banklar tieşle taläp kütärep çıqqan oçraqta, YUKOSnıñ inde bügennän ük bölgenlekkä töşüen añlata ala, läkin Societe Generale citäkçelegendäge şuşı banklar törkeme älegä monıñ belän aşıqmayaçağın äytä. YUKOSnıñ matbuğat wäkile Aleksandr Şadrin düşämbedä, eşlär bolay däwam itsä şirkät bölgenlekkä töşüen inde ber aydan soñ uq xäbär itäçäk dip belderde. Şuşı süzlären ul finans ministrı urınbasarı Şatalov belderüenä qädär äytkän ide. YUKOSqa bölgenlek alay tiz yanamağan oçraqta da, salımnarnı tülämäwe säbäple mölkäten tartıp alu şirkätneñ neft çığaru mömkinleklären şaqtıy çikläde. YUKOS könenä ber milliard 700 million miçkä neft çığara, bu bar dönyada kön sayın tabılğan neftneñ 2 protsentın täşkil itä. Däwlät dawlağan salım burıçların tüläw öçen YUKOS xäzer üze belän bäylängän şirkätlärneñ mölkäten sata başladı, läkin xakimiat 2000-nçe häm 2001-nçe yıllar belän genä çiklänmäskä cıyına kebek, sişämbedä "Exo Moskvı" radiosı, baş prokuror Vladimir Ustinovnıñ, YUKOSqa 2002 häm 2003-nçe yıllar öçen dä salım däğwaları belderelä ala dip äytüen xäbär itte. YUKOSnı ezärlekläw başında toruçılarnıñ berse bulğan Ustinov, bu eşneñ başı bar, läkin azağı älegä kürenmi dip beldergän.

Kärim Kamal
XS
SM
MD
LG