Accessibility links

Кайнар хәбәр

Könyaq Aziädäge köçle su basular yoğışlı awırular çığu qurqınıçın arttıra


Aziädä inde öç atna däwamında barğan köçle yañğırlar millionlağan keşene yort-cirsez qaldırğannan soñ xäzer inde şul qaza töbäklärendä törle yoğışlı awırular çığuğa kiterde. Hindstan, Bangladeş, Nepal, Vietnam häm Qıtaynıñ su basqan töbäklärendä eç kitü häm dizenteriä kebek awırular tarala başladı.

Hindstannıñ Bihar ştatında cirle xakimiat çir taralunı tuqtatu maqsatında xalıqqa xlorin daruın tarata. Su basu arqasında ildäge kanalizatsiä sistemasınıñ saftan çığuı häm eçär öçen çista su citmäwe yoğışlı awırularnıñ kürşe Bangladeşta da tarala başlawına kiterde. Taşular inde ilneñ başqalası Dhakkağa da citte.

Audio, Bangladeş

Su basu qorbannarı Bangladeş başqalasında üzlärenä azıq-tölek häm başqa törle yardäm sorıy. Bu il taşularğa här yılnı duçar bula, läkin bıyılğısı soñğı yıllarda iñ dähşätlese. Näq şundıy uq qatlawlı wäzğiat bar könyaq Aziädä, uzğan ayda başlanğan monsoon yañğırları bar qitğada yaqınça 24 million keşene torğan cirennän kitärgä mäcbür itte. Alarğa xäzer aşığıç yardäm - azıq-tölek, çista su, çatırlar kiräk, läkin taşularnıñ yullarnı yuwıp kitüe säbäple qaza töbäklärenä ütep kerü xäzer şaqtıy qatlawlandı. Hindstannıñ tönyaq-könçığış Assam ştatında yardämgä xärbilärne cälep itälär, alar boralaqlardan azıq-tölek taşlap, köymälär belän sudan qaçıp qalqulıqlarda tuplanğan xalıqnı cıyıp yöri.

Audio, Singh

"Bez inde 3 meñnän artıq keşene qotqardıq, häm şuşı eşebezne bez monda däwam itäçäkbez, härber keşeneñ ğömeren saqlap qalaçaqbız" di hind ğäskäre mayorı Singh. Läkin keşelärne qotqaru ğına citmi, alarnı azıq-tölek wä su, waqıtlı toraq belän tä''min itü zarur. Näq menä bu ölkädä problemalar älegä citärlek. Qotqarılğannarnıñ berse menä närsä di.

Audio, Bolu Bharalai

"Ğäskär keşeläre bezne qotqardı-qotqaruın, tik bez üzebez belän berni dä ala almadıq, üzebezne saqlap qaldıq, läkin älegä qädär bernindi dä yardäm almadıq" dip zarlana Assam ştatında su basudan qotqarılğan ber adäm. Meteorologlar bu könnärdä könçığış Hindstan häm Bangladeşta tağın da köçleräk yañğırlar bulaçaq dip kisätä. Ä Vietnamnıñ tönyağında yañğırlar inde atna buyı bertuqtamıy bara, andağı su basu qorbannarı sanı şimbä könne 50-dän artıp kitte dip xäbär itelä.

Kärim Kamal
XS
SM
MD
LG