Dönya cämäğätçegeneñ iğtibarın cälep itkän Olimpiä uyınnarına, Tatarstan tamaşaçıları da bitaraf tügel. Anda Tatarstannan 10 sportçı qatnaşa. Menä alar: Ciñel atletika törennän – Gölnara Samitova häm Yekaterina Kondratyeva, Su polosı –İrek Zinnurov häm Marat Zakirov, yözüdä Aleksey Zatsepin häm Yana Martınova yarışaçaq, şpaga ostası İgor Radugin çempion isemen däğwälap qarayaçaq. Ä menä Älmät qızı Ol’ga Smirnova irekle ısulda köräşep qararğa, dip Olimpiä uyınnarına bara. Häm, ğädättägeçä, Svetlana Demina sınawlarnıñ stendtan atu törendä çığış yasayaçaq. Tatarstan sportçıları kübräk tä bulır ide, ämma kilep çıqmağan. Mäsälän, bıyıl Qazan qızı Anastasiä Kolesnikova da, Çallı qızı Läysirä Ğabdraxmanova yarıştan töşep qalğan.
Küpçelek respublika tamaşaçıları Tatarstan sportçılarına televizor qarında utırıp qına teläktäşlek kürsätsä, ber unlap tatarstanlınıñ Gretsiägä barıp, yarışlarnı üz küzläre belän kürergä mömkinlege bula. Respublikanıñ sport häm yäşlär eşläre ministrı Marat Bariev Afinağa barırğa uylap tora. Anıñ belän Tatarstanıñ räsmi wäkillegenä, elekke sport komitetı başlığı Xänif Mortazin, elekke olimpiä uyınnarı çempionnarı häm sport veterannarı kerä. Tatarstannıñ räsmi delegatsiäse respublika sportçıları çığış yasıy torğan könnärdä, ber atnada soñ ğına Afinağa oçarğa uylap tora. Uyınnarnıñ açılu tantanasın, alar da, öylärendä genä qarıy.Bikä Timerova.
