Tatarstannıñ radio cihazların citeşterüçelär üzläreneñ Rusiädäge kollegaları belän berläşä. Bu xaqta Tatarstannıñ premyer-ministrı Röstäm Miñnexanovnıñ Rusiäneñ radioelektronika idäräse citäkçese Yuriy Borisov belän oçraşuınnan soñ bilgele buldı. Qazannıñ Radiopribor berläşmäse nigezendä älege tarmaqtağı şirkätlär federal’ xoldingka berläştereläçäk. Respublika xakimiäte radioelektronika citeşterä torğan älege berniçä şirkätne tatarstan qaramağında qaldırırğa teläp, inde 3 yıldan artıq berläşügä qarşı kilep barsa da, nihayät federal’ üzäk üzeneñ maqsatına ireşä kebek.
Udmurtiäneñ eşmäkärläre bu könnärdä Tatarstanğa täcribä urtaqlaşırğa kilde. Alar şulay uq respublikada bu tarmaqtağı qanuni nigezlämälär, yaña, üzençälekle eş ısulları belän tanıştı. Tatarstanda uzıp baruçı yılnıñ yartısında küp kenä tarmaqlarda üseş küzätelä. Başqalardan spirt citeşterü şirkätläre dä qalışmıy. 7 ay eçendä respublikada spirt citeşterü 34 protsentqa artqan. Xäyer, älege külämdä araqı häm alkogol’le eçemleklärne bez üzebez öçen genä tügel, ä çitkä cibärer öçen dä citeşteräbez ikän.
Tatarstan yullarında häläkätlär sanı da arta bara. Äle Älmät yanındağı 8 keşeneñ ğömeren özgän faciğä dä onıtılıp ölgermägän, ä Qazan yanında Vaz maşinası belän MAZ yök avtomobile bärelep, tağın ike keşe häläk buldı. Barısı yıl başınnan Tatarstanda 2507 yul qazası terkälgän. Alarda 306 keşe ülgän, 3120 keşe törle däräcädä cäräxätlängän. Şulay itep, respublikanıñ yul qurqınıçsızlığı xezmätenä eş kimemi.
Citmäsä, Qazannıñ yaqınlaşıp kilüçe zur bäyräme alarğa tağın da mäşäqätlär östi. Qayber mäğlümätlärgä qarağanda, kiçlären Qazan uramnarında utlar yandırıp, sirena qabızğan GİBDD patrul’läre ozatuında maşina kortejları yöri ikän. GİBDD xezmätkärläre tuqtap, älege maşinalarnı ütkärep cibärmägän avtomobil xucalarına ştraf sala. Bu çara şähärneñ maşina yörtüçelären tärtipkä öyrätü öçen ütkärelä. Çönki şähärneñ meñyıllığı uñayınnan kilgän Qazan qunaqların şulay yörtäçäklär. Qazan avtomobilçeläre tärtipkä xäzer ük öyränä torsın, imeş. Xäyer, respublikanıñ yul qurqınıçsızlığı xezmäte idäräsendä mondıy reydlarnıñ ütüen raslasalar da, anıñ maqsatların bezgä başqaça añlattılar. Avtomobil yörtüçelärne mondıy ısul belän citäkçelär yäki zur qunaqlardan torğan kortejlarnı tügel, ä yanğın sünderü häm aşığıç yärdäm maşınaların çiratsız ütkärergä öyrätälär ikän. Läkin mondıy öyrätü çaralarınıñ näq menä bäyräm aldınnan başlanıp kitüe küp kenä keşelärdä şik tudıra.
Gölnaz İlgizär
