Accessibility links

Кайнар хәбәр

Bagdad cıyınında qatnaşuçılar Ğiraqnıñ waqıtlı xökümätenä tänqit belderä, ber törkem delegat Nacafqa cibärelde


Nacafta tınmağan qorallı bäreleşlär sürätendä başqala Bagdadta barğan ilküläm konferensidä meñnän artıq delegat Ğiraqnıñ 100 keşedän toraçaq waqıtlı şurasın saylarğa tırışa. Bu şuranıñ wäkälätläre ällä ni zur bulmasa da, anıñ tiräsendä qaynar bäxäslär bara.

Mondıy qaynar bäxäslärne Saddam çorında küz aldında da kiterep bulmas ide. Nacaftağı xällär könferensiä eşenä älbättä üzgäreş kertte. Küplär andağı xällärgä xökümätneñ säysätenä rizasızlıq belderä. Menä üzen Falah dip tanıtqan delegat, premier-ministr Ayad Allawi citäklägän xökümätneñ tetmäsen tetä:

Audio (Falah)

"Bu süz berläşterü. Nacaftağı qan qoyu öçen Ğiraq xökümäte cawaplı, amerikan xärbilären Nacafqa alar çaqırıp kiterde. Häm bu minem genä fiker tügel, monda küplär şulay uylıy."

Yäkşämbedä Bagdadnıñ "yäşel zona" dip atalğan bistäsendä açılğan konferensiädä ilneñ 18 töbägennän, törle säyäsi firqä, dini törkem citäkçeläre, barlığı 1300-läp keşe qatnaşa. Sişämbegä alar 100 keşelek waqıtlı şuranıñ 81 äğzasın raslarğa tieş. Qalğan 19 urın ameriknnar tarafınnan bilgelängän häm May ayında taratılğan Ğiraqnıñ waqıtlı şura äzğalarına qaldırılğan. Yaña şura kiläse yılda ütäçäk saylawlarğa qädär ğämäldä bulaçaq. Anıñ wäqälätläre nindi soñ? Menä alar: xökümätneñ eşçänlegen küzätü, kiräk bulsa anıñ qararlarına veto salu, kiläse yılnıñ büdjetın raslaw. Qayberäwlär, Ncaftağı xällärne istä totıp, şurağa kübäräk wäkälät birergä täqdim itä. Misal öçen, delegatlarnıñ berse Nafi Äl-Zamili:

Audio (Nafi Äl-Zamili)

"Xökümät Nacafnı utqa totqanda bu nindi konferensiä di. Bezgä bu xökümätne xökem itä alırlıq yaña şura saylarğa kiräk."

Saylaw eşläre älegä bik sülpän bara, çönki bäxäslärneñ kübese älege dä bayağı Nacaf tiräsendä. Menä inde 10 kön Nacafta şiği ğisyançılar belän amerikan xärbiläre arasında bäreleşlär bara. Ğisyançılarnıñ ber öleşe şiğilar öçen izge sanalğan imam Ali qäberlegenä sıyınğan. Xöcüm başlansa aña zıyan kilergä mömkin. Düşämbedä Bagdad konferensiäsenä cıyılğan delegatlar Nacafqa ber törkem cibärergä kileşte. Bu törkem şiği citäkçe Moqtada Äl-Sadr belän oçraşıp anı qoral taşlarğa öndärgä cıyına. Äl-Sadr xäräkäte Bagdad konferensiäsendä qatnaşmıy. Monnan tış Allawi xökümätenä qarşı bulğan tağın berniçä törkem konferensiägä boykot belderde. Şul isäptän, Sönni möselman ruxaniları berläşmäse. Berläşmä citäkçeläreneñ berse Şäix Möxämmät Bäşär Äl-Fäydi Britaniäneñ "Guardian" gäzitenä, "bu konferensiä amerikan okupatsiäsen bizäp kürsätü tırışlığı" dip belderde.

Ali Gilmi, Praga
XS
SM
MD
LG