Accessibility links

Кайнар хәбәр

Putin Soçidä Gerhard Schroeder häm Jacques Chirac belän oçraşa


Rusiä prezidentı sişämbedä Soçidä Germaniä kanslerı Gerhard Schroeder häm Fransiä prezidentı Jacques Chirac belän oçraşu ütkärde. Söyläşülärdä Ğiraq häm İrandağı wäzğiat, yaqlarnıñ energetika ölkäsendäge xezmättäşlege, başqa möhim mäs''älälär qaraldı, läkin töp tema bulıp terrorğa qarşı köräş probleması tordı dip xäbär itelä.

Terror bu oçraşuğa turıdan-turı yoğıntı yasadı, xörmätle tıñlawçılar. Öçyaqlı söyläşülär Soçidä äle düşämbe kiçen ük başlanırğa tieş ide, läkin alar Putin belän Schroeder arasında ğına ütte - Fransiä citäkçese, Ğiraqta ike fransuz xäbärçesen totıq itep alu häm alarnı üterü belän yanaw säbäple üzeneñ Rusiägä kilüen kiçektergän ide. Terror probleması Mäskäw öçen dä şaqtıy aktual'' bulıp qala birä - uzğan atnada ğına Rusiädä ike yulçı oçqıçı şartlatıldı, ilneñ iminlek xezmätläre xäzer inde, bu hiçşiksez terror höcüme bulıp tora dip isäpli. Soçi söyläşülärennän soñ monı prezident Putin üze dä äytte häm çäçän ğisyançıları belän "äl-Qaidä" arasındağı bäyläneş yänä ber raslandı dip belderde. Çeçnädäge bäysezlek tarafdarları üzläreneñ Rusiädäge oçqıçlarnı şartlatuğa qatnaşı bulmawın täqrarlasa da, Putin alarnıñ xalıqara terrorğa bäyle buluına şiklänmäwen äytä.

Audio, Vladimir Putin

"Ägär dä terror oyışması cawaplılıqnı üz östenä ala ikän, häm ul "äl-Qaidä"gä bäyle ikän, bu Çeçnädäge qayber köçlärneñ xalıqara terror belän dä bäyle buluın raslıy" di Rusiä prezidentı häm, "bez moña qarşı köräştek, köräşäbez, köräşäçäkbez dä" dip belderä. Putin süzlärenä qarağanda, yäkşämbedä Çeçnädä uzğan prezident saylawları häm Mäskäw yaqlağan Alu Alxanovnıñ anda tawışlarnıñ 74 protsentın qazanuı, töbäktäge küpçelekneñ federal'' üzäk alıp barğan säyäsätne yaqlawın kürsätä.

Audio, Vladimir Putin

Vladimir Putin, ägär dä kemder tawış birergä kilä ikän, bu anıñ respublikadağı säyäsi tormışta qatnaşırğa teläwen añlata, ä saylawlarda qatnaşu Çäçän respublikasında bik yuğarı ide" dip belderä. Könbatış, ayırım alğanda Quşma Ştatlarnıñ däwlät departamentı, Çeçnädäge soñğı tawış birüne, ul irekle wä ğadel buludan yıraq ide dip tänqitläsä dä, Rusiä başlığı, törle illärdän, şul isäptän möselman wä ğäräp illärennän dä kilgän xalıqara küzätüçelär saylaw qanunın bozu oçraqlarına tarmadı dide. Şuşı süzläre belän ul, üze yanında basıp torğan Schroeder häm Chirac yağınnan işetelä alğan ixtimal tänqitne dä aldan uq beterep quydı. Schroeder da, Chirac ta şunda uq, Çeçnädäge wäzğiat yaqın kiläçäktä totrıqlanır digän ömet belderde. Läkin Fransiäneñ üz mäşäqätläre säbäple Soçi oçraşuında Çeçnä mäs''äläse elekke tösle tikşerelmägän bulsa kiräk. Anda berençe çiratta Ğiraq tiräsendäge wäzğiat, İrannıñ atom programması, Rusiä belän Yevropa arasındağı yağulıq xezmättäşlegeneñ kiläçäge qaraldı. Qunaqları belän kileşep Putin, Mäskäwneñ atom qoralına iä bulğan illär sanınnıñ artu ixtimalına kisken qarşı çığuın äytte. Berük waqıtta ul üz ileneñ İran belän, tınıç atom programmalrın üsterü ölkäsendä kiläçäktä dä xezmättäşlek itäçägen belderde. Mäğlüm ki, Quşma Ştatlar häm İzrail yağınnan tänqitlänügä qaramastan Rusiä İrannıñ berençe atom stansiäsen tözügä yardäm itä. Prezident Putin Yevropa qunaqlarına, dönyada üsä barğan ixtiacnı iskä alıp üzendä neft çığarunı arttırunı da wäğdä itte.

Kärim Kamal
XS
SM
MD
LG