Accessibility links

Кайнар хәбәр

Qazan Kremle Mäskäwgä qarap eşläyäçäk


Rusiä Prezidentınıñ xakimiät vertikalen nığıtu öçen nindi çaralar kürergä cıyınuı, respublika citäkçelären bilgeläw häm terrorğa qarşı toru çaraları xaqında söyläşülär, ğadi xalıqnı borçuğa saldı, dip äytep bulmıy. Közge yañğırlar tuqtap, qoyaşlı könnärneñ urnaşuı, kübräk, qırlardağı bäräñge uñışın alu turında uylanırğa etärä. Şul xaqta, Tatarstan televidenie kanalları ütkärgän xalıq fikeren soraştırular kürsätä. Alayda, xakimiätne reformalaw turında işetüçelär dä bar. Qaysıberläre, Putin närsä eşläsä, şul döres, dip äytsä, ikençeläre, xalıqqa üzlärenä citäkçene saylarğa mömkinlek birsennär ide, dip cawap birde.

Tatarstan Prezidentı Mintimer Şäymiev, 13 sentäber kiçendä, Mäskäwdän qaytqaç, hawa alanında uq, jurnalistlar aldında çığış yasap, üz añlatmaların birde. Xäbärçelärne, federalizmnıñ kiläçäge qızıqsındırdı. Mintimer Şäymiev, Federalizm, demokratiä häm iminlek taläplären ber uq waqıtta saqlarğa bik awır bulsa da, kiregä qaytu bulmayaçaq, dide. Mintimer Şäymiev, ber yaqtan, region citäkçelären parlament tarafınnan raslap quyunı yaqlap çıqsa, ikençe yaqtan, töbäk citäkçeläreneñ rolen kimetügä yünältelgän adımnar yasaluğa borçılu belderde. Misal itep ul, Federal Üzäk häm töbäklär arasında wäqälätlärne büleşü barışın kiterde. Federal Üzäk wazifalarnı üzenä kübräk aldı, töbäklärgä äzräk qaldırdı, dip añlattı Mintimer Şäymiev. Xäzer xakimätkä oçraqlı keşelär bulmas, ämma cirle citäkçelärneñ cawaplılığın, xoquqların arttırırğa kiräk, dide ul. Tatarstan Prezidentı Federal Üzäk häm cirle xakimiätlär belän wäqälätlär almaşu turındağı kileşülär xaqında tulıraq mäğlümat tä birde. Mäsälän, Şäymiev äytkänçä, bu oçraqta süz federal ministrlıq häm Tatarstan xakimiäte belän kileşü tözep, Mäskäwdäge häm Qazandağı ministrlıqlarnıñ wäqälät büleşü turında bara. Anıñ nigezendä federal häm regional xakimiät wazifaların başqaruçı berdäm ministrlıqlarnı tözü küz aldında totıla. Mintimer Şäymiev, şulay uq, millätlär ministrlığın buldırunı xuplap çıqtı. Ämma, ul waqıtta, ministrlıq isemendä millätlär süze töşep qaluı turında bilgele tügel ide, häm prezident, ozaq waqıt millätlär mäs’älälären bağuçı oyışma kiräklegenä basım yasawın iskä töşerde. Şuña östäp, qanunnarğa qarata cämäğätçelek fikeren belü öçen tözelä torğan ictimaği palatanıñ eş ürnäklären Tatarstanda da qullanıp bulır ide, dide Tatarstan Prezidentı.

Şulay itep, Mintimer Şäymievnıñ süzlärennän çığıp, tübändägelärne äytep bula. Tatarstandağı ministrlıqlarnı, Rusiä xökümäte räweşenä turı kiterep, üzgärtep qorular kötä. Respublikağa ictimaği palata tözelergä mömkin. Häm, iñ möhime, Tatarstannıñ saylaw qanunnarına tözätmälär kerteläçäk.



Tatarstan matbuğatında mäğlüm üzgäreşlärgä az bulsa da mönäsäbät belderü bar. Mäsälän «Watanım Tatarstan» gäzite, Vladimir Yakovlevnıñ Regional säyäsät ministrı bularaq uñışlı eşläwenä şik belderä. Gäzitneñ baş möxärrire, Yakovlev vitse-premeyer bulıp eşli almadı, Tönyaq Kavkazğa cibärelde, inde xäzer bu urınnan da küçerelä, anı millätlär eşlären bağuçı ministrlıqqa bilgeläp quyarğa telilär, dip yaza. Gäzit şulay uq, Rusiä Prezidentı äytkän, iminlek öçen cawaplı yaña köç strukturalarınıñ, ictimaği palatanıñ nindi bulaçağı xaqında anıq mäğlümat bulmawın bilgeläp ütä. «Şähri Qazan» häm «Tatarstan yäşläre» gäzitläre bu xäbärgä mönäsäbät belderergä tügel, anı bastırırğa da ölgermägän. «Vostochniy ekspress» gäzite, Tatarstan säyäsätçelärennän soraştıru ütkärgän. Mäsälän, Räşit Yäğfärov, Mäskäw östän prezidentnı bilgeli başlasa, milli respublikalarda monı añlamaslar, dip cawap birä. Federatsiä Şurasında respublika wäkile İrina Laroçkina : bar närsä dä döres eşlänä, dip äytä. Tatarstan deputatı Marat Ğaliev xakimiätne üzäkläşterü bara dip, belderä. Säyäsät belgeçe Midxät Faruqşin, Rusiä Prezidentı bu oçraqta artığın tırışıp cibärde, digän ruxta cawap birä. Başqa gäzitlär älege waqlarğa qarata, bötenläy mönäsäbät beldermi.

Bikä Timerova.

XS
SM
MD
LG