Accessibility links

Кайнар хәбәр

Tatar yäşläre cırğa ostalıqların kürsätä alaçaq


Tatarstanda “Bars-rekords” prodyuserlıq üzäge tatar cırların xalıqqa citkerü häm cırçılarnı tanıtu öçen törle çaralar uzdırıp kilüe mäğlüm. Yıl sayın oyıştırıla torğan “Tatar cırı” bäygese dä üsä bara, ämma qızğanıç anda kübräk Salawat Fätxetdinov, Zöfär-Zäynäp kebek inde xalıqqa tanılğan başqaruçılar çığış yasıy. Ä şaqtıy köçle tawışlı yäşlärneñ şou-biznesqa ütep kerergä mömkinlege yuq. Çönki ul küp aqçalar taläp itä. Şul nisbättän “Bars-rekords” yaña proyekt uylap çığarğan. Älege proyekt xaqında “Azatlıq” radiosı xäbärçesenä “Bars-rekords” prodyuserlıq üzägeneñ redaktorı Danil Säfärov bolay dip belderde

25 sentäber könne “Lenin” mädäniät sarayında säğät unberdä kasting uzaçaq. Anda telägän här yäş cırçı qatnaşa ala. Kastinğa “Bars-rekords” prodyuserlıq üzäge oyıştıra. Häm yäşlärgä älege üzäk belän xezmättäşlek itärgä mömkinlek tuaçaq. İñ yaxşı cırçılar belän general' kontrakt tözeläçäk.

Äytergä kiräk, bügen urıs yäşlärenä üzlären tanıtırğa mömkinleklär zur: “ Fabrika zvezd”, “Narodnıy artist” kebek proyektlar şularnıñ berniçäse genä. Ä tatar cır sänğäte haman ber cirdä taptana. Xätta yäşlärgä diskotekada bierlek tatar cırları yuq, tatar diskotekaların oyıştıruçılar beraz bulsa da bezneñ moxitkä yaqınraq bulsın dip Tarkanğa, Morat Nasıyrovqa möräcäğät itärgä mäcbür bulalar.

25 sentäber könne uzaçaq kasting näq menä şul yäş cırçılar öçen ütkärelä häm ul barı cır yunäleşe buyınça ğına baraçaq. Qatnaşırğa tezläwçe ike cır äzerlärgä tieş: berse - xalıq, ikençese - estrada cırı. Jyuri iñ oşağannarnı saylap alaçaq häm alarğa “Bars-rekords” Cırlar yazdıru, kliplar töşerü, konsertlarnıñ audio-wideorolikların yasaw, reklam kampaniälären uzdıruda yärdäm itäçäk. Şunnan inde xalıq arasında populyarlıq qazanuğa da küp qalmıy.

Kasting oyıştırılu tağın şunısı belän yaxşı, anda dönyanıñ törle poçmağınnan här telägän keşe qatnaşa ala. Barı tatar cırın ğına başqarsın. Ä Rusiä töbäklärendä cır sänğäte neçkäleklären belüçe yäşlär şaqtıy. Qazanda ütkän tatar yäşläre könnärendäge konsertlarda bu açıq kürende. Tatarstanda küp bäygelär barı respublika keşeläre öçen genä oyıştırılu säbäple, çittäge millättäşlärebez küp oçraqta qırıyda qala. Xäzerge köndä yäş millättäşlärebez öçen barı “Yağımlı yaz” festivale genä bar. Ğomumän “Bars-rekords” böten dönyadağı tatarlar belän eşlärgä äzer. Bu xaqta Danil Säfärov “Azatlıq” radiosına bolay dip belderde

“Bars-rekords” Tatarstanda, Qazanda icat itüçelär belän genä eşlämi, çittäge millättäşlärebez belän dä xezmättäşlek itä. Menä küptän tügel Finlyandiyadä icat itüçe Cämiläneñ diskı çıqtı. Bezneñ maqsat – geografiäne kiñäytü. Çittäge millättäşlär bezgä möräcäğät itä ala.

Şulay itep kastingta qatnaşırğa teşläwçe här yeget-qız 25 sentäber könne “Lenin” mädäniät sarayına kilä ala. Bäyge säğät 11 dä başlana.

Landış Xarrasova

XS
SM
MD
LG