Berençe sentäber irtäsendä Udmurtiä başqalası İjaw şähäreneñ tatar gimnaziäsenä balalar, ata—analar, uqıtuçılar yaña uqu yılı başlanuğa bağışlanğan tantanağa bilgelängän waqıttan aldan cıyıldılar. Qullarındağı çäçäk bäylämnärenä kümelgän keçkenä genä buylı malay—qızlarnı berençe klass balaları ikänen yıraqtan tanıp bula. Başta balalarınnan da kübräk dulqınlanğan äti—äniläre belän tanışam. (audio)
Balaların milli ruxlı, tatar canlı itep tärbiälärgä omtılğan ata—analar sabıyların biregä kitergän, älbättä, üzläre dä näni ulları—qızları belän bergä belem basqıçlarınnan kütärelergä äzer alar. Bu xaqta ikençe ber balanıñ äbise äñgämäbezgä quşılıp, monı rasladı.
İnde gimnaziä uquçılarınıñ da ber—bersen sağınıp, oçraşır minutların kötep aluları kürenep tora, törkem—törkem balalar ber—bersen sälämläp, köleşep mäş kilälär. Mäktäptä soñğı tapqır berençe sentäberne qarşı alam, şuña bu kön ayıruça dulqınlandıra, dip urtaqlaştı fikerläre belän Rozalina Ğataullina. (audio)
Bu arada yaña uqu yılına bağışlanğan tantana başlanuı turında iğlan itelde. Gimnaziä uquçısı Diliä Äxmätşina gimnaziägä bağışlanğan cırnı başqardı. Yaña uqu yılı belän qotlap, gimnaziä direktorı Gölzirä Äxmätşina, Tatar ictimaği üzäge citäkçese Fnyun Mirzayanov, şähärneñ Aqsaqallar cämğiätennän wäkillär, respublikanıñ mäğärif ministıyrlıygınnan belgeç, Lenin rayonı administratsiäsennän wäkillär qotladı. Balalar häm uqıtuçılar mawıqtırğıç itep teaträlläşterelgän küreneşlär dä äzerlägän. Tantana ozaqqa suzılmıyça, bik canlı ütte.
Yaña uqu yılınıñ berençe qıñğıraw tawışı balalarnı klasslarğa çaqırdı. Çığarılış sıynıf uquçıları berençelärne citäkläp, bülmälärgä uzdılar. Barlıq klasslarda da berençe däres belem dönyasına säyäxätkä bağışlandı. Qunaqlar belän gimnaziäne qarap çıqtıq, bıyılğı yañalıqlardan — kitapxanä.
Şul uq waqıtta gimnaziägä yanqorma tözü turında problema hawada elenep qaldı. Urın citmi biredä. Şuña da här yıl berençe sıynıfqa ber genä klass tuplana. Alar da äle balalar baqçasında uqi. Ul binada da kileşü buyınça soñğı yıl uqilar başlanğıçlar. Kiläse yılda balalarnı qaya utırtırbız dip körsenep quydı direktor. Gimnaziä xezmätkärläreneñ klasstağı ber genä balanı da yuğaltmıyça, çığarılışqa çaqlı saqlap qalırğa kiräklegenä basım yasadı.
Barlıq uquçılarğa tırışıp uqırğa, uqıtuçılarğa sabırlıq, ata—analarğa härwaqıt yärdämçel bulırğa telim — dip basım yasadı äñgämäbezdä Udmurtiä Respublikasınıñ mäğärif ministıyrlıygınnan baş belgeç Älfiä Ğaysina. (audio) Östäp şunı da äytergä kiräk, bıyıl udmurt gimnaziäseneñ dä balalarnı utırtırğa urın bulmaw säbäple, gimnaziäne İjaw şähäreneñ çitendä urnaşqan ber mäktäpkä küçerergä qarar qıldılar ministıyrlıykta. Ämmä ata—analar monıñ belän kileşmiçä, berniçä kön inde Xakimiät binası qarşında piket oyıştırdılar. Alarnıñ taläbe— udmurt gimnaziäse öçen şähär üzägendäge berär mäktäptän urın alu. Xäbär äzerlängän säğättä — mäğärif ministıyrlığı xezmätkärläre belderüençä, balalarnı gimnaziägä yörtü öçen maxsus avtobus bulaçaq. Ata—analarnıñ ber äleşe monıñ belän kileşte, ikençeläre — udmurt gimnaziäse üzäktä bulırğa tieş digän fikerennän kire qaytmadı.
