Accessibility links

Кайнар хәбәр

Ukraina prezidentlığına oppozitsiä namzäte Viktor Yuşçenko ağulanğan, digän xäbärne Avstriä tabipları kire qağa


31 Üktäber, prezident saylawları yaqınlaşqan sayın Ukrainada säylaw aldı köräşe qıza bara. Prezidentlıqqa namzälärneñ berse, oppozitsiä citäkçese Viktor Yuşçenko kötmägändä xäle naçarlanıp Vena xastaxanäsenä yatqannan soñ, anıñ tarafdarları, tabiplarğa tayanıp, Yuşçenkonı ağulap üterü tırışlığı kürelgän, digän xäbär taratqan ide. Çärşämbedä Avstriä tabipları Yuşçenko ağulanğan bulğan dip äyter öçen nigez yuq digän belderü yasadı.

Ukraina prezidentı urınına töp namzätlärneñ berse, oppozitsiädäge "Bezneñ Ukraina" bloğı citäkçese Viktor Yuşçenko 9 sintäberdä awır xäldä Avstriä başqalasınıñ Rudolfinerhaus şäxsi xastaxanäsenä kiterelde. Anı däwalağan tabip Nikolay Korpan küp sanlı taypılışlar buluın açıqlasa da, tögäl diagnoz quya almadı:

Audio (Nikolay Korpan): "Bu meditsina öçen ğädäti xäl tügel, bik siräk küreneş , qatlawlı awırular belän bergä nindider nerv taypılışları."

Korpan süzlärençä, bu berär törle bilgesez virus, yä, ixtimal, ağulanu näticäse bula ala. Yuşçenkonı törle tarmaq belgeçläre, barlığı 20läp tabip däwalap, axır çiktä ayaqqa bastırğannar. Ber atndan Kievqa qaytqaç ul mondıy belderü yasadı:

Audio (Viktor Yuşçenko): "Minem yözemä qarağız, minem söyläwemne tıñlağız. Minem belän bulğan xäl aşaw belän genä bäyle tügel. Bu – ildäge säyäsi rejim belän bäyle mäsälä."

Yuşçenkonıñ tarafdarları anıñ ağulanğan, xättä nindi matdä belän ağulanğan bulın söyläde, citmäsä şul uq Rudolfinerhaus tabiplarına tayandı. Ämmä çärşämbedä bu xastaxanä, räsmi belderü yasap, bu xäbärlärne kire qaqtı. Belderüdä mondıy süzlär bar: "Ukraina häm dönya-küläm mäğlümät çaralarında Yuşçenkonıñ ağulanğan buluı turında xäbärlär taratıla. Bu xäbärlärdä bezneñ xastaxanä telgä alına. Çınbarlıqa, Rudolfinerhaus isemennän anda eşlämägän keşe söyli. Yuşçenko ağulanğan bulğan dip äyter öçen ber nigez dä yuq." Ber ük waqıtta Avstriä tabipları Yuşçenko belän çınbarlıqta närsä bulğanı turında berni xäbär itmäde. Ul arada çärşämbedä anıñ xäle yänä naçarlanğan digän xäbär taratıldı.

31 Üktäberdä ütäçäk saylawlarda Yuşçenko xäzerge prezident Leonid Kuçma namzäte sanalğan, premier-ministr Viktor Yanukoviç belän köräşä. Soñğı fiker beleşülärgä qarağanda, bu ike namzätneñ reitingları tigezläşkän, ikeseneñ dä 34% çaması. Ber atna elek Yuşçenko berniçä protsentqa alda bara ide.

-Ali Gilmi
XS
SM
MD
LG