Accessibility links

Кайнар хәбәр

Mäxkämädä – tatar yazması


Mäğärif xezmätkärläre balalarnı yäşärgä öyrätä, matematika, tuğan tel, çit tellär, geografiä, biologiä, informatika buyınça belemnär birä. Bu sişämbedä tatar yazması turındağı bäxäs uquçılar häm uqıtuçılar, studentlar häm professorlar, näşirlär häm jurnalistlar dairäsendä genä tügel, ä böten däwlätkä, xätta çit illärgä yañğıradı. Başqa waqıtta tatar tele, ädäbiäte, matbuğatı belän üzlären säyäsätçe, iqtisatçı dip sanawçılar bötenläy qızıqsınmıy ide. Şul isäptän, qayber millättäşlärebez dä. Ä bu sişämbedä Rusiä Konstitutsiä mäxkämäsendä Tatarstan Däwlät Sovetınıñ Rusiä Däwlät Duması qararı östennän şikäyäte qarala başladı. Bu şikäyättä Tatarstan tatar älifbasınıñ nindi grafikada buluın xäl itärgä xaqlı, dip äytelgän. Ä Duma häm federal' üzäk wäkilläre milli tellärneñ grafikası barı tik federal' qanun belän genä raslarğa mömkin, dip sanıy. Rusiä qanunnarı häm xalıqara xoquq normaları buyınça bu bäxässez närsä. Här xalıq, milli respublika niçek yazarğa, uqırğa kiräklegen üze belä. Ä Rusiä säyäsätçeläre häm xakimiät wäkilläre moñı qapma-qarşı fikerdä. Qanun buyınça xäl itsäñ, monda tatarlarğa, Tatarstanğa tel tiderep bulmıy. Ä köç belän basqanda, älbättä, kem yuğarıraq utıra, şul xaqlıraq. Citmäsä, Konstitutsion mäxkämä aldınnan Mäskäwdä ber törkem tatarlarnıñ latin imlasına qarşı çirattağı xatın imzalatıp, mäğlümat agentlıqlarına tarattılar.

Bu sişämbedä Rusiä Konstitutsion mäxkämäsendä älifba häm Tatarstanda tatar telen uqıtu turındağı mäs’älälärne tikşerügä bağışlanğan utırışta Tatarstan Däwlät Sovetı räise Färit Möxämmätşin dä qatnaştı. İnterfaks mäğlümat agentlığı xäbär itüenä qarağanda, ber törkem deputatlar Federatsiä Şurası äğzäläre Konstitutsion mäxmäkägä barıp, üzläreneñ taläpläre belän çığış yasağannar. Kavkazdağı suğış terrorizm belän köräştä tuplanğan qüät xäzer tatar yazmasına yunältelä. Mäxkämä utırışı berniçä kön däwam itep, berniçä atnadan ğına basılıp çığa. Ägär dä, Rusiädä iñ zur milli respublikalarnıñ berse ildäge san buyınça ikençe xalıqnıñ tuğan tele qullanışı qanuni räweştä çiklänsä, milli inqıyraz tatarlarnı ğına tügel, barlıq millätlärne dä basıp kitäçäk, dip sanıy Tatarstannıñ qayber säyäsätçeläre.

Rimzil Wäli

XS
SM
MD
LG