Oktäber ayında Qazan däwlät universitetınıñ tatar studentları gäzite “Täräzä”gä 1 yäş tuldı. Ämma anı küplär belmi, çönki anı studentlar üzläre çığara. Yaña sanda Liliä Ğibadullina, Yoldız Miñnullina, Aysılu İmamieva, Aydar Camaliev h.b. yäş talantlarnıñ äsärläre basılğan. Ä menä “Sabantuy”ğa – 80 yäş. Äye, balalar häm üsmerlär gäzite bulğan, yaratqan “Sabantuyı”bız dönya kürä başlawğa tögäl sigez distä yıl ütep kitkän.
1924 yılnıñ 10 oktäberendä “Sabantuy” “Yäş leninçı” iseme belän basıla başlıy. Tirajı 1,5 meñ bula. Şähit Şammazov balalar basmasınıñ berençe möxärrirläre. Baştağı yıllarnı Musa Cälil, Abdulla Aliş, Fatix Kärim, Ämirxan Yeniki, soñraq Möxämmät Sadri, Zäki Nuri, Mäxmüt Xösäyen kebek yazuçılarnıñ tormış yulı “Yäş leninçı” belän turıdan-turı bäylänä. 1930 yılda Fatix Kärim gäzitneñ cawaplı särqәtibe bula, 1934 tä Abdulla Aliş gazeta qarşında ädäbi tügäräk oyıştıra. Xäyer, qaysı ğına yazuçı, qaysı ğına şağir berençe adımnarın “Yäş leninçı”dan başlap kitmäde ikän? Şul uq Şäwkät Gәliev, İldar Yuzeev, Robert Miñnullin, Zölfät, Mödärris Äğlämov h.b. kürenekle yazuçılarnı alsaq...
İr-at yazuçılarnıñ frontqa kitüe säbäple, 1941 yılnıñ 8 iyülendä gäzitneñ soñğı sanı basıla. Küräseñ, balalar ädäbiätendә xatın-qız yazuçılar bulmağan. Barı un yıldan soñ ğına “Sabantuy” yañadan eşläp kitä. 70 nçe yıllarda anıñ tirajı 105 meñgä qәdär citä xätta. 1980 yılda Bötensoyuz külämendä iñ yaxşı balalar basması dip tabıla häm berençe urınğa çığa.
“Yäş leninçı” 1990 yılda “Sabantuy” dip üzgärtelä. İseme alışınsa da, ciseme şul uq qala. Ğailädä balalar öçen iñ yaxşı tärbiäçe bula ul. 1998 yılda “Sabantuy”, balalar ädäbiätе ölkäsendäge eşçänlege öçen Abdulla Aliş premiäsenä dä layıq bula.
Ni qızğanıç, bügen, başqa tatar basmaları kebek ük, “Sabantuy”nıñ da tirajı çamalıraq. Televizor, komp'yuter ekranına berekkän balanı, annan yolqıp alıp, gäzit uqırğa utırtu bik ciñel tügel. Atnağa ber qabat sigez bitle, tösle itep dönyağa çığa torğan “Sabantuy” här ğailädä qәderle qunaq bulırlıq.
Çärşämbe könne, 20 oktäberdä “Sabantuy”nıñ 80 yıllığına bağışlanğan kiçä “Piramida” küñel açu kompleksında uzaçaq. Programması älegä ser. Şunısı bilgele: ssenariynı küp yıllar “Sabantuy” belän xezmättäşlek itkän yazuçı Barlas Kamalovnıñ ulı Röstäm Kamalov tözegän.
Lenar Şäyex, Qazan.
