Accessibility links

Кайнар хәбәр

Abxaziäneñ yaña prezidentı äle dä yuq, iskese wazğiätne üz qulına alırğa tırışa


Gruziäneñ üzbilgelängän bu respublikasında bäxäsle prezident saylawlarınnan soñ ike atnadan artıq waqıt uzuğa qaramastan, yaña prezidentnıñ iseme äle dä bilgesez bulıp qala. Saylaw komissiäse küpçelek tawışnı oppozitsiä namzäte cıydı dip beldersä, anıñ köndäşe bu qararnı yuğarı mäxkämägä birde. Ul arada wazifasınnan kitüçe prezident Vladislav Ardzinba dilbegäne yänä üz qulına ala sıman. Düşämbedä deputatlarğa möräcäğät itep ul oppozitsiä qaraşlarında torğan baş prokurornı urınınnan alırğa çaqırdı. Şul uq waqıtta bäysez mäglümät çaralarına basım yasala digän xäbärlär bar.

Abxziäneñ räsmi internet säxifiäsendä äytelgänçä, Vladislav Ardzinba deputatlarğa möräcäğät itep baş prokuror Rauf Korua''nı urınınnan alırğa çaqırğan. Parlament räise Nugzar Aşuba isemenä yazğan xatında prezident baş prokurornı saylawlar waqıtında bulğan xärämläşülärne tikşermäwdä, xökümätne çitlätergä çaqırğan opozitsiä östennän cinäyät eşe açmawda ğäyepli. Ardzinba şulay uq Koruanı opozitsiä yağın aluda, konstitutsiägä qarşı belderülär yasawğa ğäyepli. Uzğan atnakiç Suxumda ütkän mitingta çığış yasap baş prokuror Gali rayonında opozitsiä namzäte Sergei Bagapşqa qarşı xärämläşülär bulğanı turında äytkän ide:

Audio (Rauf Korua): "Gali rayonında saylawlar şoma ğına ütmäsen öçen, Bagapşnı qaralaw maqsatınnan yalğan dokumlar qullanılğan. Prokuratura bu xälne açıqlap cinäyät eşe açtı."

Prezident Ardzinbanıñ prokorurnı urıınnnan alu taläben parlament düşämbedä kire qaqtı. Abxaziädäge säyäsi qarşılıqlarnı sürätlägän tağın ber xäl: düşämbedä Yuğarı mäxkämä äğzası Alla Avidzba urınınnan kitüen belderde. Säbäplären açıqtan äytmäsä dä, Yustitsiä ministrlığı räsmiläre France Presse agentlığına äytüençä, ul bu adımı belän xökümätneñ basımına protest beldergän.

Ul arada Abxaz räsmiläre respublikanıñ bäysez mäglümät çaraların çikli başlağan digän xäbärlär bar. Düşämbedä däwlät näşriäte räsmie, texnik säbäplär arqasında bäysez gäzitlär waqıtlıça basılmayaçaq digän belderü yasadı. Abxaziädäge 4 bäsyez gäzitneñ berse "Çegemskaya Pravda" atnalığınıñ möxärrire häm xucası İnal Xaşig Azatlıqqa bolarnı äytte:

Audio (İnal Xaşig): "Sişämbe irtäsendä beryulı 4 bäysez gäzit çığası ide, alar berse dä çıqmadı, näşriättä monı texnik säbäp belän añlattılar. Bu bik säyer xäl, çönki bu texnik säbäplär Suxum häm dä Soçi näşriätendä beryulı buldı. Bu texnik tügel, säyäsi säbäpkä oşağan."

Bu 4 gäzit möxärrireneñ premier-ministr Nodar Xaşba belän oçraşu tırışlıqları tormışqa aşmadı. Berniçä deputat bu mäsälädä räsmilär belän söyläşergä wäğdä itte. Ämmä Xaşig fikerençä, monıñ näticäse bulmayaçaq:

Audio (İnal Xaşig): "Bügen xakimiätneñ törle tarmaqları ber-bersennän bik yıraq. Härberse üzençä xäräkät itä. Monıñ küpmegä suzılasın äytüe qıyın, şul isäptän bezneñ gäzitlär yazmışı turında da."

Xaşig fikerençä, Ardzinbanıñ soñğı adımnarı anıñ wazğiätne üz qulına alırğa tırışuın kürsätä. Läkin bu adımnar kiresençä, kierenkelek artuğa kiterä ala, di ul.

Abaxziädän kilgän soñğı xäbärlärgä qarağanda, prezidentlıqqa xakimiät namzäte Raul Xajimba şikäyäten tikşerüçe Yuğarı mäxkämä üzeneñ utırışın çärşämbegä küçergän. Xajimba sayalawlarda xärämläşülär bulğan dip belderä häm qabat saylawlar ütkärergä taläp itä.

-Ali Gilmi
XS
SM
MD
LG