«Tatnet yöldızları» bäygese häm anıñ belän bäyle qayber şaw-şular onıtılıp ölgermäde, tatar internet cämäğätçelege yaña bäygene ütkärergä uyladı. Tatforum.at.tt säxifäsendä bu xaqta xäbär päydä buldı. Forumnarda yazuçı keşelär arasında bäyge ütkärü täqdime belän Pantera häm Rinat Piterkiy isemnäre astında tanılğan forumçılar tanıştırdı. Forumda bäygeneñ nigezlämäse dä basılıp çıqtı. Bäyge, tatforumda yazuçı yäşlär arasında ütkärelä diälä anda. Oyıştıruçılar, virtual dönyada tanışqan keşelärne real tormışta oçraştıru, saytnı tanıtu, tatarlar cıyıla torğan cirgä cämäğätçekneñ iğtibarın tartu maqsatların quya. Bäygene oyıştıru komitetı, jyuri, belgeçlär şurası tözergä planlaştırıla. Yarış berniçä tördä ütkärelä, mäsälän, tatarça iñ küp yazuçı, tatar mädäniäte, muzıkası turıda yaza iñ küp häm qızıq yazuçı, säyäsi waqiğalarğa iñ aqıllı añlatmalar birüçe, tarixi temağa yazuçı häm iñ tatar canlı keşene saylarğa täqdim itelä. Alay ğına da tügel, söyläşep kenä qalmıyça, real tormışta millät öçen närsäder eşläwçe millättäşlärebezgä maxsus büläklär bireläçäk, tatar internetınıñ üseşe öçen tırışuçı forumçığa häm latin xäreflärendä yazuçı keşegä maxsus büläk birergä wäğdä itälär.
Forumçılar bäyge ütkärü täqdimen xupladılar, ämma yarışnıñ nigezlämäse belän kileşep betä almadılar, beraz ğına bäxäsläştelär. Yarışta qatnaşırğa layıqlı forumçılarnıñ, alarğa bäyä birä alırlıq juri äğzäläreneñ isemnäre atala başladı inde. Alar arasında Bıltır, Rustem, Nogay, Raxmetov, Millätçe, Suqır, Rif häm başqalar bar. Bäygeneñ nigezlämäse, ütkärelü waqıtı häm garizalarnı tapşıru urını turında tatforum.at.tt adresın urnaşqan internet säxifäsendä belep bula. Andağı forumnıñ ğomumi temalar digän bülegen qararğa kiräk.Bikä Timerova.
