Düşämbe könne Tatarstan Däwlät Şurası deputatlarınıñ Vladimir Putinnıñ xakimiät vertikalen nığıtu buyınça täqdimnären xuplaw 26 oktäber könne dä iğtibar üzägendä buldı. Respublika deputatlarınıñ çığışları, alarnıñ bäxäsläre xaqında cirle matbuğatta ğına tügel, xätta qayber üzäk mäğlümät çaraları da xäbär itelde. İnternettağı gäcitlärdä dä, Tatarstan Putin täqdimnärenä qarşı çıqtı, digän yazmalar uqırğa mömkin ide. Şulay itep, 25 oktäberdä uzğan Tatarstan Däwlät Şurası sessiäseneñ qaytawazı bügen dä yañğırıy.
Qazanda soñğı aralarda ay sayın açılıp torğan zur säwdä üzäkläreneñ sanı artaçaq. Respublikanıñ TAİF şirkäte Mäskäw firması belän bergälektä Balalar dönyası kibeten tözi başladı. Älege säwdä üzägeneñ mäydanı 17 kvadrat metr bulaçaq, anı tözü bäyäse 18 million dollarnı täşkil itäçäk. Öç qatlı Balalar dönyası kibete başqalanıñ yubileyına – 2005 yılnıñ 30 avgustına açılaçaq. Tizdän Qazannıñ meñyıllığına äzerlekkä Rusiäneñ tağın ber şähäre - Çiläbe totınaçaq. Alar Qazannıñ Çiläbe uramın tözekländeräçäklär. Tatarstanlılar isä Çiläbeneñ 270 yıllığına şähärdä Qazan bul’varın maturlayaçaqlar.
Sişämbe könne respublika yazuçıları bäyräm itte. Tatarstannıñ yazuçılar berlege 26 oktäber könne Qazannıñ Piramida küñel açu üzägendä üzeneñ 70 yıllıq yubileyın bilgeläp ütte. Bäyrämgä berlekkä kergän küp kenä Rusiä töbäklärendä yäşäp icat itüçe yazuçılar da kilgän ide. Berlek äğzälären Tatarstan prezidentı Mintimer Şäymiev tä qotladı. Şuşı data uñayınnan Üzäk arxiv binasında 27 oktäber könne qızıqlı kürgäzmä açılaçaq. Anda Tatarstan Yazuçılar berlege oyışqan yıllardağı dokumentlar, fotolar, törle aralardağı berlekne citäklägän yazuçılar turında mäğlümätlär, Stalin repressiälärendä zıyan kürgän icatçılar xaqında küp kenä material tuplanğan.
Qazannıñ Aq Bars xokkey komandası ciñülär sanın arttıra bara. Düşämbe kiçendä alar Perm’ şähäreneñ Molot Prikam’ya xokkeyçıların 4-2 xisabı belän ciñdelär. Şulay itep, Aq Bars komandası üzeneñ trenerı Zinnätulla Biläletdinov belän Rusiä çempionatında berençe urınnarğa menärgä tırışa. Ä menä Tübän Kamanıñ Nefteximik xokkeyçıları soñğı uyında üzläreneñ canatarların quandıra almadılar. TSSKA komandası belän öydäge uyında alar 2-1 xisabı belän ciñeldelär. Alay da, Nefteximik älegä Aq Bars komandasınnan aldaraq bara.
Gölnaz İlgizär
