Accessibility links

Кайнар хәбәр

Qazanda Marsel Sälimcanovnı iskä aldılar


Tatarstanda yal könnäre däwam itä. Şuña da, düşämbe buluğa da qaramastan Qazan uramnarı yarım buş, xätta şähärneñ üzägendä dä soñğı aralarda qazanlılarnı intektergän ul bökeläre kürenmi, küpçelek xalıq eşkä barmıy. Ä menä 6 häm 7 noyäber könnären tatarstanlılar niçek ütkärde soñ? 7 noyäberne Qazanda häm Çallıda niçek bäyräm itkännäre turında sez bezneñ tapşıruda äle işetersez. 6 noyäber – Tatarstan Konstitutsiäse köne uñayınnan respublikada ällä ni zur çaralar oyıştırılmadı. Xäyer, şimbä könne dönya kürgän matbuğat çaraları bäyräm xaqında şaqtıy yazdı, älege uñaydan Mintimer Şäymievnıñ qotlawların bastırdı. Tatarstan prezidentı referendumda respublikanıñ töp qanunı qabul itelügä 12 yıl tulu uñayınnan citkerelgän möräcäğätendä, bezneñ töp qanunıbız qanunnar çığarı häm alar belän eş itü ölkäsendä dönyada häm üz ilebezdä tuplanğan täcribäne häm qazanışlarnı üz eçenä ala, demokratiäneñ iñ yuğarı standartlarına cawap birä, dip äytä. Şulay uq anda Mintimer Şäymiev, Rusiäneñ üseş prinsibın ğämälgä aşırunıñ iñ yaxşı ısulı – federalizm, tiränten uylanılğan milli säyäsät, häm bez üzebezneñ şuşı nigez prinsiplar tarafdarı buluıbız xaqında qat-qat qabatlıybız, digän fikerlär äytä.

6 noyäberdä şulay uq Tatarstan delegatsiäseneñ Koreya respublikasına räsmi säfäre başlandı. Ul 4 kön däwam itäçäk. Respublikanıñ premyer-ministrı Röstäm Miñnexanov citäkçelek itkän tatarstanlılar törkeme Koreyada LG, Samsung kompaniäse wäkilläre belän oçraşaçaq, Tatarstanda Koreya belän bergälektä alıp barılğan neft’ ximiäse berläşmäsen tözü xaqında söyläşäçäk, dip xäbär itä Tatar-inform agentlığı. 8-9 noyäber könnärendä isä Tatarstanda Vyetnam sotsialistik respublikasınıñ wäkilläre bulaçaq. Alar respublika xökümäte wäkilläre, Qazanda yäşäwçe vyetnamlılar belän oçraşaçaq.

Ğomumän, yallar häm bäyrämnär bulu säbäple respublikada bu könnärdä ällä ni zur säyäsi, iqtisadi çaralar uzmadı. Ä menä mädäniät ölkäsendä xäbärlär bar. 7 noyäber könne tanılğan rejisser Marsel’ Sälimcanovnıñ tuğan köne. Aña bıyıl 70 yıl tulğan bulır ide. Älege datanı Qazanda zurlap bilgeläp üttelär. Şimbä könne Qazannıñ mädäniät häm sänğät universitetında Marsel Sälimcanov häm XX ğasırnıñ tatar sänğäte dip isemlängän fänni konferensiä uzdı. 7 noyäberdä Ğäliäskär Kamal teatrında rejisserğa bağışlanğan tantanalı kiçä uzdı. Kiçä aldınnan teatr binasında Marsel Sälimcanovnıñ bronzadan qıyılğan byustı açıldı.

Gölnaz İlgizär

XS
SM
MD
LG