Bu iftarğa “Natsional" jurnalında eşläwçelär genä tügel, ğomumän Mäskäwneñ baytaq qına massaküläm mäglümät çaralarında eşläwçe möselman jurnalistları çaqırılğan ide. Mäskäwdä jurnalistlar berlegeneñ ber bülekçäse bulıp terkälgän Mäskäw möselman jurnalistları citäkçese Radik Amirov ta bu eşlärdä üzeneñ yärdämen kürsätkän. Komersant gazetasınnan da, NTV televidenie kanalınnan da jurnalistlar bar ide ul iftar aşında. Jurnalistlar öçen oyıştırılğan bu awız açu yagni iftar aşı barlıq qağidälärgä kertelep oyıştırılsa da, barıber ğädäti bulmadı. Çönki bu oçraşu üzenä kürä dini temalardan başqa, jurnalistlarnı qızıqsındırğan temalarğa söyläşü bularaq ta ütte. Mäsälän “Kommersant” gazetasınnan kilgän jurnalistlar äle yaña ğına Londannan bulıp qaytuları, anda möselmannar çirkäwlärne satıp alıp, alardan mäçet yasawları turında söylädelär. Londonnıñ Üzäk mäçetendä yañğırağan azan Böyekbritaniäneñ patşabikä sarayına da işetelep tora didelär alar.
Şulay itep “Natsional''” jurnalı ütkärgän awız açu mäclese qızıqlı söyläşülärgä bay buldı. Jurnal üze äle mart ayınnan ğına çığa başladı. Ul jurnalnıñ här sanında bik küp törle millätlär turında mäglümätlär tabarğa bula. Ä inde tatarlar turında mäglümätlär jurnalnıñ här sanında zur urın alıp kilä. Jurnalnıñ soñğı sanında mäsälän tatar belän tatar arasında nindi ayırma bar digän mäkälä, tatarlarnıñ kilep çığuına tarixi qaraş taşlağan. Qayber ğalimnärneñ fikerlären kitergän. Ni öçen östälgä tersäkne quyarğa yaramıy digän sorawğa da şuşı jurnalda cawap tabarğa bula. Çönki östäl Allaxı tägläneñ üç töbe dielgän anda. Şulay itep. Dini idaräneñ konferensiä zalındağı östäl yanına 50 läp jurnalist cıyılğan ide ul iftarğa. Jurnalnıñ baş möxärrire Röstäm Arifcanovtan min, Nigä sezneñ jurnal awız açu mäclese ütkärergä buldı. Elegräk andıy mäcleslär oyıştırğanız bar ideme dip soradım. Röstäm Arifcanov, yuq elegräk ütkärgänem yuq ide, Çönki uzğan yıl Ramazan ayında bezneñ bu jurnalıbız yuq ide äle, annan soñ üz isememnän şundıy olı mäcles ütkärergä qıyulığım citmäs ide minem dip cawap birde. Annan soñ ul, bez jurnalda ilneñ ike dine möselman häm xristian dinnärenä igtibar biräbez. Möselmannarnıñ qızıqlı häm zıyalı keşelär buluı xaqında jurnalnı uqçılarğa citkerergä tırışabız dide. Röstäm Arifcanov.
İftar mäclesendä jurnalistlarğa Qorän sürälären Möxämmät Qaraçay isemle imam uqıdı. Ul üze dä milläte belän qaraçay ikän. Min annan bu oçraşu xaqında äytüen ütendem Qaraçay telendä söyläsägez dä bula digännän soñ. Möxämmät Qaraçay, süzen şayartıp başladı.
Ramazan ayı yıldan yılğa Mäskäwdä aylarnıñ iñ üzençälekle bulıp qala. Bu ayda tatar möselmannar öçen bernindi küñel açuçı çaralar da. Konsert programmalar da kürsätelmi. Çönki xalıq barmayaçaq ul çaralarğa. İnde ber yıl aldan uq qaysı yortta nindi iftar bulası, bilgelänep, Qor''än uquçılarğa da çiratqa yazılğan xalıq. Ä inde Ramazan ayı ütügä ikençe könne ük Ramazanğa bağışlanğan konsertlar çiratı başlana. 16 noyäberdä, “Kosmos” qunaqxanäseneñ konsertlar zalında ütärgä tieş bıyılğı Ramazan konsertı. Şul uq könne Kremlneñ syezdlar sarayında Renat İbrahimovnıñ da konsertı bilgelängän. Ä inde 20 noyäberdä Kosmostağı konsert zalında Mäskäwlelär Başqortostan cırçısı Näzifä Kadıyrovanı benefisı belän qotlayaçaq. 26 noyäberdä Xaniä Färxi dä 3 kiç buyına Mäskäw tamaşaçıların üzeñ yaña programması belän söyenderäçäk. Ä xäzergä üzeneñ soñğı atnasına kergän Ramazan ayı däwam itä. 9 noyäber Qader kiçäse.
Näzifä Kärimova, “Azatlıq” radiosı Mäskäw.
