Accessibility links

Кайнар хәбәр

9 Ğinwar 2005 Fälästindä saylawlar ütäçäk: Yasir Arafatnıñ warisı kem bulır?


Uzğan atna wafat bulğan Yasir Arafatqa almaş ezläw niätennän Fälästin citäkçeläre 9 Ğinwarda saylawlar ütkärergä qarar itte. Yaña citäkçe mäsäläsen kiçekterü töbäktä tärtipsezlekkä säbäp bula ala digän qurqular bar. Yäkşämbedä prezidentlıqqa namzätlärneñ berse, Fälästin ne azat itü oyışması räise Mäxmüt Abbas kilgän urında atışular buldı. Abbasqa zıyan kilmäsä dä, ike keşe hälaq buldı.

Fälästin citäkçese Yasir Arafat wafatınnan soñ Üzidarä belän citäkçelek itü wazifası, konstitutsiä nigezendä, waqıtlıça Parlament räise Rawhi Fattuhqa tapşırıldı. Ul arada Fälästin citäkçeläre waqıtnı ozaqqa suzmıyça Arafatqa almaş ezläw eşenä dä kereşte. Yäkşämbedä Ramallada ütkän oçraşuda alar saylawlar könen bilgeläde. Bu xaqta räis wazifasın başqaruçı Rawhi Fattuh iğlan itte:

Audio (Rawhi Fattuh): "Fälästin Üzidaräse prezidentın saylawlar 2005neñ 9 ğinwarında ütçäk. Saylaw komissiäse moñarçı terkälmägän saylawçılarnı terki başlıy. 20 noyäberdän başlap, 12 kön buyına namzätlär üz namzätlegen iğlan itä ala. Saylawaldı kompaniäse 27 dikäberdä başlanıp 8 ğinwarğa qädär baraçaq."

Başqaça äytkändä, saylaw aldı kompaniäse Arafatnıñ 40ğı uzu belän başlanaçaq.

İzrail bu xäbärne xuplap qarşı aldı. Saqlanu ministrı Şaul Mofaz, bez, wäkälätle, solıx niätle häm terrorçılıqqa qarşı bulğan, Fälästin neñ teläsä nindi xökümäte belän eş itergä äzer dip belderde.

Äbü Mazin quşamatı belän tanılğan, Fälästin ne azat itü oyışması citäkçese, 69 yäşlek Mäxmüt Abbas, prezidetnlıqqa töp namzätlärneñ berse bulır dip kötelä.

Salmağaraq qaraşta toruçı Abbas yäkşämbedä Gazada, märxüm Arafatnı iskä alu möräsime barğan urınğa kilgäç, andağı Fatah xäräkäte äğzaları "Abbas Amerika ışpionı" dip qıçqırıp häm hawağa ata başladı. Kilep çıqqan eteş-törteş, atışular näticäsendä Abbasqa zıyan timäde, ämmä anıñ ike tän saqçısı hälaq buldı. Abbas üze dä, başqa räsmilär dä, bu Abbasnı üterü tırışlığı tügel, barı tik bäxetsez oçraq dip sanıy. Şul uq waqıtta, bu oçraq – saylawlar belän ozaqqa suzırğa yaramağanın, açıq kürsätä, di alar.

Prezidentlıqqa tağın ber ixtimal namzät – yäkşämbedä İminlek şurası başlığı itep raslanğan premier-ministr Äxmät Qöräi.

Abbas ta, Qöräi dä ölkän yäştäge säyäsätçelär, belgeçlär fikerençä, alarnıñ abruyı aqrınlap töşä bara, ä menä yäşräk buyın säyäsätçelärneke, xäzer kiresençä kütärelä. Ä inde töbäktä kierenkelek artıp kitsä, säxnägä Hamas, Cihad kebek radikal törkemnär dä qalqıp çığarğa mömkin. Arafat isän çaqta alar ölkän buyın citäkçelärgä turıdan-turı bärelergä cör''ät itmi ide. Arafat kitkännän soñ wazğiät tiz arada üzgärergä mömkin.

-Ali Gilmi
XS
SM
MD
LG