Accessibility links

Кайнар хәбәр

Ukrainada wazğiät kierenke bulsa da, belgeçlär köç qullanu bulmas digän fikerdä


Xökümät här törle qanunsızlıq bastırılaçaq dip kisätsä dä, oppozitsiä massa küläm protestlar belän saylaularnıñ näticäsen üzgärtergä tırışa. Cirle belgeçlär köç qullanu bulmayaçaq, xökümät belän oppozitsiä bäxäskä tınıç xäl çarası tabarğa tırışaçaq dip ışana.

Räsmi belderügä qarağanda, premier Viktor Yanukoviç ikençe tur prezident saylaularında 49 yarım protsent, oppozitsiä kandidatı Viktor Yuçenko yaqınça 47 protsent tauış alğa. Läkin, oppozitsiä saylaularda xärämläşülär buldı dip näticälärne qabul itmi. Kievta häm başqa şähärlärdä massa küläm protestlar bara. Vazğiät kierenke bulsa da, küzätüçelär ike yaq ta bäxäskä tınıç yullar belän xäl qılu çarası tabarğa tırışaçaq digän fikerdälär. Kievtağı bäysez Rönesans oyışması programma direktor Oleksander Betsanıñ fikerençä, prezident Kuçma Ukrainada revolutsiägä yul quymayaçağın beldersä dä, politik täräqqiät köç qullanuğa kitermiäçäk.

Audio

"Xakimiätlärneñ mäsäläne köç qullanıp xäl itäçäkläre şikle. Oppozitsiäneñ dä xakimiätne moña etäräçäge ikele. Här kem tınıç xäl çarasın tabu öçen tırışaçaq. Oppozitsiäneñ xärämläşülärneñ buluı dokumentlanğan saylau okruglarında , saylaularnıñ näticäsen köçtän çığarunı sorap mäxkämägä möräcäğät itüe mömkin. Läkin bu xaqta dälillär bulırğa tieş."

Washingtondağı İrekle Yortınıñ ölkän xezmätkäre Adrian Karatnıçkı Kievtan telefon aşa xäbärçebezgä Könbatış xökümätläre häm oyışmalarınıñ oppozitsiä belän eş itkändä prezident Kuçmağa totnaqlıq kürsätüe öçen basım yasauları mömkin dip belderde. Läkin, krizisnıñ niçek tämamlanuında töp rolne Yuşenko taraftarlarınıñ protestlarnı dävam itü itmävennän bäyle bulaçaq.

Audio

"Qış yaqınlaşa. Kiläse könnärdä temperatura nuldan tübäneräkkä töşäçäk. Kiev häm başqa şähärlärdä Ukrain xalqı protestlarnı ber-ike kön genä dävam ittererme, ällä üz xoquqların ozaq vaqıt yaqlayaçaqmı."

Xökümätkä kilgändä, anıñ politik konfrontatsiäne , oppozitsiä citäkçelärenä koalitsion xökümättä qatnaşunı täqdim itüe belän yomışatırğa tırışuı mömkin. Läkin, oppozitsiäneñ monı qabul itüe ikele.

Färit İdelle, Praga.
XS
SM
MD
LG