“İdel” jurnalı 22 noyäberdä Ğ.Kamal teatrında üzeneñ 15 yıllıq yübileyen uzdırdı.“İdel” jurnalınıñ Ğ.Kamal teatrı zalında uzdırılğan yubiley kiçäsenä kerergä teläwçelär bik küp buldı. Zal sıydıra almaslıq tamaşaçı kilü säbäple, barlıq keşelär dä kiçägä kerä almadılar. Çaqıru käğäze totıp kilgän KDUnıñ tatar fakul'tetında uqığan studentlarnıñ da bu kiçägä kerä almıyça, bik ozaq işek yanınnan kitmiçä basıp toruları da, yäşlärneñ “İdel” jurnalın yaratuınıñ dälile buldı. Teatr zalınıñ säxnäsendä bu könne dilbegäne “İdel”çelär tottı. Alarnı täbriklärgä Tatarstannıñ “Tatmedia” massaküläm mäğlümat çaraları agentlığı wäkilläre , TR mädäniät ministrlığı xezmätkärläre , törle oyışma wäkilläre häm “İdel”gä yazuçı avtorlar, häm jurnal dusları kilgännär ide. “İdel” jurnalınıñ baş redaktorı Raşat Nizami jurnalda basılıp çıqqan xikäyälärgä, mäxäbbät turındağı şiğerlärgä häm ğomumän törle yazmalarğa ütkärelgän bäygelärdä ciñep çığuçılarğa ğädätkä kergän diplom tügel, ä “yarlıq” lar tapşırdı. Kiçäneñ ikençe bülegendä mädäniät ölkäsendä yumor ostası bulıp tanılğan Almaz Xamzin, tamaşaçı küñelen fantastik, satirik äsäre belän yauladı. Anıñ “İdel” jurnalında inde küptän basılıp çıqqan , ämma bügen dä aktual'lege kimemägän “Cir astı imperiäse” isemle fantastik satirik äsären Ğ.Kamal teatrı artistları uynadı. Anda Çıngızxan, Söyembikä xanbikä, Ütämeşxan, Napoleon, Petr I, Äbi patşa – Yekaterina II, Gitler, Stalin, Lenin, Mao Sze Dun, Xruşçev, Brejnev kebek personaj-şäxeslärneñ xarakterları çağıldırıla. Anda törle zamannarda törle illärneñ citäkçeläre bergä cıyılıp cir astı imperiäsen tözergä xıyallana. Bu rol'lärne Qamal teatrı artistları bik üzençälekle başqardı. Azatlıq radiosı, Mälikä Basıyr, Qazan.
