Berniçä yıl elek “Şärıq” klubında yörüçe ber törkem yäşlär teatr tügäräge oyıştırıp cibärep G.Kamalnıñ “Berençe teatr” spektaklen quyğannar ide. Qızğanıç, şärıqlelärneñ törlese törle cirdä uqu häm eşläw säbäple bik siräk cıyıla aldılar, spektakl'ne dä alar barı Qazanda häm Bolğar şähärendä genä quydılar. Şunnan soñ yäşlär taraldı. Şärıq teatrına yörüçe yäşlär şaqtıy bulsa, bulaçaq jurnalistlar törkemennän torğan teatr studiäsenä 3 nçe kursta uquçı 8 qız häm ike yeget kerä. Teatr studiäseneñ oyışıp kitüe turında 3 kurs studentı Rail Ömetbaev “Azatlıq” radiosına bolay dip söyläde
Älege fiker miña Bötendönya tatar yäşläre forumınnan soñ kilde. Bergä uqı torğan yeget-qızlar belän cıyıldıq ta äsär sayladıq. “Acağan” äsäre şaqtıy tirän mäğnägä iä häm anda uynar öçen barı ike yeget kenä kiräk. Ä bezneñ bülektä yegetlär az. Şuña bu äsärgä tuqtaldıq.Teatr studiäse yegetlär-qızları barısın da üz köçläre belän oyıştırğannar. Repitisiyalarne uqudan soñ tönge unikelärgä qädär uzdıralar. Qızğanıç, spektakl'dä rol'lärne başqarudan tış yäşlärgä finans mäs’älälärne dä üzlärenä çişärgä turı kilä. İğänäçelär ezläp qarağannar. “Taba almadıq. Şulay inde, bez bit fitness konferensiäsen xip-xop festivalen utkärmibez. Bez bit tatarça teatr quyabız. Alay bulğaç, qızıq tügel, kiräk tügel. Ğafu itegez dilär bezgä,” - dip açına yäşlär. Törle töbäklärgä çıqqanda yul aqçasın Bötendönya tatar kongressı qaplıy ikän. Yäşlär küptän tügel Kirov ölkäsendä bulıp qaytqannar. Rail' Ömetbaev annan qaytqan tä'sirläre belän urtaqlaşa
Kirov ölkäseneñ Malmıj rayonındağı tatar awılında buldıq. Bezne bik cılı qarşı aldılar. Xalıq monda tatar tamaşalarına susağan ikän. Spektakl'dä xätta cılap utırdılar.“Ay bulmasa yoldız bar” spektaklenä kilgändä, yäşlär anı üzlärençä añlap üzlärençä uynıy. Dramanı üzençälekle muzıykal' bizäleş belän baytkannar. Çönki yäşlär qırı söylämne tügel, ä kübräk tamaşa yarata.
“Acağan” törkeme bu atnada Layış rayonınıñ Olı yılğa häm Keçe yılğa awıllarında, kiläse atnada Teläçe rayonnarında spektakl' kürsätäçäk. Ä iñ zur säfärläre Mäskäwgä bulaçaq. Bu turıda Rail' Ömetbaev
18 dekaber könne Mäskäwneñ Äsadullaev yortında spektakl' quyaçaqbız. Bezne inde zarığıp kötälär. Barlıq oyıştıru mäs’äläläre dä söyläşelgän.Kürenä ki, yäşlär eşkä izge niät belän totınğan. Ämma alarnıñ millät, tatar yäşläre öçen dip yanıp yörüläre küpmegä citär. Çönki spektakl' quyu çığımnar sorıy. Ul aqçalar küp kenä oyışma citäklägän tatar keşeläre öçen bik az bulsa da, här tienne ata-analarınnan sorarğa mäcbür bulğan studentlarnıñ kesäsenä şaqtıy suğa. Respublikanıñ Yäşlär häm sport ministrlığı törle şaw-şulı tamaşalar uzdırırğa meñlägän aqçalar sarıf itä. Ä tatar yäşläre härwaqıttağıça ügi bala kebek çittä qala.
Landış Xarrasova
