Ukraina saylaw aldı kompaniäsendä Tatarstannan, säyäsi texnolog, Radik Ğatin da eşläde. Ul inde Qazanğa äylänep qayttı. «Azatlıq»qa birgän intervyusında ul tübändägelärne söyläde:
«Ukraina Prezidentı şäxese öçen kübräk Rusiä yaqlı häm Könbatış tarafdarları yarıştı. Yanukoviç häm Yuşenko saylaw ştablarında saylaw texnologiälärneñ iñ yaxşı belgeçläre eşläde. İke yaq ta, barı tik ciñügä genä yöz tottı». Radik Ğatin uylawınça, Tatarstannıñ Ukraindağı mänfäğätlärenä zıyan kilmäsen öçen, respublika aldan uq, andağı säyäsätçelär belän söyläşergä tieş bulğan. Här xäldä üzeneñ pozitsiäsen bilgeläsä, döresräk bulır ide, dip sanıy ul. Belgänegezçä Ukrainada Tatarstannıñ neft qorılması bar. Ğatin äytüençä, Viktor Yüşenko elek qabul itelgän biznes qararların kire qağu yäki qaytıp qaraw turında belderep kilgän.
Yanukoviç ciñü belän dä, problema tuarğa mömkin. Çönki citäkçeneñ komandası alışınırğa mömkin, başqa ıruğ keşeläre kilsä, alar elek qabul itelgän qararlar belän kileşerlärme, yuqmı, ber kem äytä almıy, digän fikerdä tora Radik Ğatin.
