Accessibility links

Кайнар хәбәр

Ukrainada protest çaraları, 4nçe kön – Yuçenko ciñgänçe köräşergä wäğdä itä


Bü könnärdä bar dönyanıñ iğtibarı Ukrainada disäk, hiç arttıru bulmas, xörmätle tıñlawıçlar. Menä inde 4nçe kön meñlägän keşe yäkşämbedä ütkän saylawlarnıñ räsmi näticälärenä protest belderä. Çärşämbe kiçendä Üzäk saylaw komissiäse premier-ministr Viktor Yanukoviçnı yaña prezident dip iğlan itkännän soñ, anıñ köndäşe, oppozitsiä citäkçese Viktor Yuçenko üzeneñ tarafdarların ilküläm qarşılıq akisäse başlarğa çaqırdı. Quşma Ştatlar räsmi näticälärne tanımawın belderde. Yevropa Berlege tawış birü waqıtındağı xärämläşülärne tikşerergä çaqıra. Rusiä prezidentı Vladimir Putin isä Yanukoviçnı tağın ber tapqır ciñüe belän qotaldı.

Saylaw näticäläre belän riza bulmağan meñlägän keşe menä inde 4 kön rättän Kievnıñ Bäysezlek mäydänında Viktor Yuçenkoğa teläktäşlegen belderä. Çärşämbedä üzäk saylaw komissiäse premier-ministr Viktor Yanukoviçnı yaña prezident dip iğlan itkännän soñ, Yuçenko üzeneñ tarafdarların ilküläm qarşılıq aksiäse başlarğa çaqırdı:

Audio (Viktor Yuçenko)

"Bu wazğiättän çığu öçen berdän ber yul – xalıqnıñ ixtiarın kürsätü. Şuña kürä Milli qotqaru komitetı ilküläm säyäsi qarşılıq iğlan itä."

Yuçenkonıñ köräştäşe Yulia Timoşenko süzlärençä, oppozitsiä ike yul belän baraçaq. Berse, saylaw näticälären Yuğarı mäxqämägä birü. İkençese – ilküläm qarşılıq. Timoşenko üz tarafdarlarına köç qullanmasqa, provakatsiälärgä bireşmäskä çaqırdı. Törle xäbärlärgä qarağanda Kievka könçığış Ukrainadan Yanukoviç tarafdarları kiterelä. Älegä köndäş törkemnär arasında da, tärtip saqlawçılar belän dä çualışlar yuq. Yuçenko tärtip saqlawçılarğa möräcäğät itep, alarnı üz xalqına qarşı barmasqa çaqırdı:

Audio (Viktor Yuçenko)

"Bez ber hawa sulıybız. Bezneñ ilebez, konstitutsiäbez urtaq. Duslar, cıyılışığızda qarar qabul itep, qarşılıq aksiäsenä quşılığız."

Yuçenko, axırına qädär baraçağın äytep, Ukrainadağı xällärne bar dönya küzätä, ämmä bezgä ciñüne berkem dä büläk itmiäçäk, bez üzebez köräşergä tieş dide. Äytkändäy, bugenge mintingta ber çit il qunağı da qatnaştı. Polşanıñ elekke prezidentı, mäşxür Soldarnost xäräkäte citäkçese Lech Walesa:

Audio (Lech Walesa)

"Min ğömerem buyı şul uq ideallar öçen köräştem. Bezneñ wazğiät bälki awırraq ta bulğandır. Min sezneñ ixtarığa xäyran qaldım, häm ciñep çığuığızğa ışanam."

Qayber mäglümätlärgä qarağanda, Lech Walesa oppozitsiä belän xakimiät arasında söyläşülärdä aradaşçı bulırğa mömkin. Ukrainadağı xällär çınlap ta bar dönya iğtibarında. Çärşämbedä Quşma Ştatlar däwlät sekretare Colin Powell, bez Ukrainadağı räsmi näticälärne qanuni dip tanıy almıybız, çönki tawış birü waqıtındağı küp sanlı tärtip bozular, xärämläşülär tikşerelmäde, dide. Yevropa Berlege şulay uq, Ukraina räsmilären, xärämläşü turındağı xäbärlärne tikşerergä taläp itä. Şuşı sürättä Rusiä ber çığarma bulıp tora. Çärşämbedä Rusiä prezidentı Putin, Yanukoviçnı, 4 kön eçendä ikençe tapqır ciñüe belän qotladı. Saylaw aldı kompaniäse waqıtında Putin Ukrainağa ike tapqır kilep, Rusiä taraflı namzätkä teläktäşlek beldergän ide. Bügenge mitingta Yuçenko Rusiäne demokratiä häm ireklek yağın alırğa çaqırdı:

Audio (Viktor Yuçenko)

"Rusiä säyäsmännärenä Ukrainada demokratiä häm ireklek yağın alırğa waqıt. İmanım kamil, waqıt belän Rusiä üze dä añlayaçaq: aña ezlekle säyäsät alıp bara almağan, banditlar tarafınnan idarä itelgän Ukraina tügel, ä demokratik Ukraina kiräk. "

Äytergä kiräk Ukrain xalqınıñ küp kenä tanılğan şäxesläre Yuçenko yağın ala. Misal öçen, kiçäge mitingta çit ildän qaytıp töşkän dönya çempionı, bokser Vladimir Kliçko, bügengesendä Ukrainanıñ pop-yoldızı, 2004 yılda Eurovision bäygesen ciñgän Ruslana Lejiçko çığış yasadı. Ruslana Yuçenkoğa teläktäşlek belderep, xättä açlıq iğlan itte. Kievnıñ Bäysezlek mäydanında barğan mitingta bezneñ Qırımnan kilgän millättäşlärebez dä qatnaşa. Xäzer süzne şularnıñ bersenä, Qırım telekompaniäseneñ qırım-tatar bülek möxärire Ridwan Xälilovqa biräm:

Audio (Ridwan Xälilov)

-Ali Gilmi
XS
SM
MD
LG